WILLEMSTAD.-EXTRA a tuma nota awe mainta di trabounan di limpiesa ku tabata tuma lugá riba Caracasbaaiweg na altura di e pòmp di gasolin. Sigur nos ta aploudí e trabounan di limpiesa ku ta tuma lugá. Mester bisa ku e limpiesa na e área aki ta hopi nesesario pasobra e kantidat di sushi kantu di kaminda ta molestiá bista. Tin algun grupo di siudadano ku ta tuma komo nan aporte na komunidat pa limpia diferente área i Caracasbaaiweg na hopi okashon ta haña limpiesa.

Ta hopi lamentabel pa tuma nota ku no ta dura dos dia i tur áreanan keda haña limpiesa ta mes òf mas sushi atrobe, esei ta un indikashon ku ya e konsenshi no tei serka e grupito di hende porko ku ta sigui benta sushi for di nan outo òf trùknan ku ta kore ku sushi sin ku ta tapa esakinan. Kampaña di konsientisashon i motivashon ta bunita i lo yuda hende na tinu, pero e lo no tin efekto serka esnan ku no tin konsenshi i p’esei konsientisashon sin medida represivo fuerte lo no yuda. Danki un bia mas na tur esnan ku ta hasi trabou di limpiesa.