WILLEMSTAD - Siman pasá a tuma lugá e entrega ofishal di un trùk di awa nobo pa distribuí awa pa agrikultornan chikí i tambe pa kunukeronan mas grandi.

Minister Sisline Girigoria di GMN ku sumo plaser a batisá e trùk nobo di awa i a mustra riba e importansia di e servisio aki. Den temporada di sekura, agrikultornan i kunukeronan por dispone di awa di gobièrnu pa nan plantashon. Di e manera aki gobièrnu ta sostené agrikultura, tantu pa provení den un entrada komersial, komo pa pèrkurá pa bo mes kuminda orgániko. Minister Girigoria ta konvensí ku ta nesesario pa nos ta outosufisiente mirando e situashon na paisnan for di kua nos ta importá. I tambe mester tuma na kuenta kambionan klimatológiko i nan efekto riba nos produkshon di kuminda .

E trùk di awa ku tabata usa pa partimentu di awa tin bastante luna for di sirkulashon di manera ku no por a kumpli ku e tantísimo petishonnan. Aktualmente tin un lista di espera di mas ku 200 persona.

Minister Girigoria aktualmente ta sperando yegada di un trùk mas di awa ku ya gobièrnu a kumpra pa AVB. Pues pronto AVB ta disponé di total tres trùk di awa pa por duna e agrikultornan loke nan meresé. Minister Girigoria entretantu a regla pa e trahadónan di AVB por traha atardi despues di ora di trabou i tambe den wikènt, pa kumpli mas pronto posibel ku tur e petishonnan ku tin tantu tempu ta warda awa.