WILLEMSTAD.- “Landsverordening Materieel Ambtenarenrecht” 1964 (LMA), konsiderá komo e beibel di ámtenarnan, ya no tin base legal, el a bira inválido na momentu ku Kòrsou a bira outónomo den Reino na aña 2010. Esei ta loke EXTRA por konkluí for di un konseho ku Raad van Advies (Konseho Konsultativo) a duna resientemente. T’asina ku RvA ta bisa ku riba propio inisiativa el a opta pa duna konseho riba tópiko aki den kuadro di areglonan ku a kaduká na momentu ku Kòrsou a kambia di status.

LMA di 1964 ta aplikabel ainda?

Pa loke ta e punto di bista di gobièrnu riba e pregunta aki, e ta bisa ku den e sekshon di aklarashon na página 6 ta keda stipulá ku LMA no a kaduká na momentu ku Kòrsou a kambia di status i bira un pais outónomo den Reino. No tin kuestion aki di un kambio òf ku ta hala LMA aden. Ademas LMA 1964 no a ser poné riba e lista negativo di e Areglo General di Transishon.

Segun gobièrnu, banda di e LMA 1964 tin un LMA nobo (2010) i ku den ehekushon di e areglonan aki ta apliká e prinsipio di ku, e lei mas nobo tin prioridat riba esun bieu den kaso ku tin partinan den ámbos lei ku no ta kuadra ku otro. Den un kaso asina  lógikamente lo nifiká ku areglonan manera e Lei Salarial 1998 i e Areglo Salarial 1998 ainda ta na vigor.

Opinion di RvA:

RvA den esaki ta duna su posishon riba e valides legal di LMA 1964. E ta introdusí bisando ku tantu e Areglo di Estado Antia Hulandes komo ERNA (Eilanden-Regeling Nederlandse Antillen) komo a bin kaduká  entrante 10-10-10, pues for di e fecha ei nan no ta válido mas den e órden legal di Pais Kòrsou. Pues di akuerdo ku e areglo prinsipal e desishonnan di ámbos areglo, e.o. LMA 1964 i e areglonan di ehekushon basá riba esaki ta keda invalidá pareu entrante 10 di òktober 2010.

Segun RvA ta splika mas aleu, un dokumento legal ku lo mester a wanta invalides di LMA 1964 no tabata eksistí tampoko e anochi promé ku Kòrsou a bira outónomo den Reino. Pues a base di e ponensianan aki lo por konkluí ku tantu LMA 1964 komo e desishonnan di ehekushon basá riba e lei ei no tin valides den e órden legislativo di Pais Kòrsou.