Den e proseso pa aliviá área di  Piscadera di brote di sangura, gobièrnu ta informá; Ya ta pòmp awa, pero di ken?

WILLEMSTAD.-  Gobièrnu ta informá ku ta kuminsá pòmp awa di e Laguna di Piscadera pa asina hasi esaki mas salú i evitá ku sangura ta pone webu eiden.

Elvin Gerard ayera a manda un seri di portrèt di loke el a konstatá na e Laguna aki. El a tuma nota ku e Kompania Priva, esta MNO, ta bezig ta pòmp tur e lodo ku tur e porkerianan aden i mand’é pa laman na e parti sùitwèst, pegá banda di e Playa Públiko Parasasa. Esaki segun Gerard tin peligernan pa e playa i tur e personanan ku ta bishitá e playa su salú; i banda di esei e ta un peliger pa e ekosistema bou di Laman, esta pa nos Koralnan i pa tur e  espesienan bibu bou di Laman manera nos piskánan ets. ets.!

Remarkabel ta ku gobièrnu ta manda un komunikado ayera ku ta bisa ku lo bai pòmp pero ku tin di buska oferta promé. Si no ta gobièrnu a laga pòmp, ta ken a laga pòmp e ora ei.

E informante di gobièrnu/GMN ta bisa lo siguiente;

Últimamente área di Piscadera tin hopi molèster di sangura. Esaki ta konta pa e área residensial pero tambe e área turístiko. Personanan ku ta kana riba Koredor ku ta paralelo na e Laguna di Piscadera tambe ta eksperensiá hopi molèster. E Laguna aki por sierto ta un foko di molèster di sangura i mester buska un solushon pa esaki. Den e kuadro aki Ministerio di GMN den estrecho koperashon ku Ministerio di Tráfiko, Transporte i Planifikashon Urbano ta trahando huntu pa eliminá mas tantu posibel e sirkunstansia ideal pa sangura pone webu i multipliká den e Laguna.
E Laguna di Piscadera originalmente ta kontené awa salu. Pero e awa dushi ku ta bai abou na e Laguna di Piscadera for di e partinan mas haltu despues di áwaseru, ku tempu ta redusí e salinidat di e Laguna i krea un medio ambiente ideal pa sangura pone webu. Pa solushoná esaki, mester sòru pa oumentá e salinidat di e Laguna i esaki ta posibel si pòmp e awa manda otro partinan di e Laguna i alabes pòmp awa salu fresku di laman manda den e Laguna. Di e forma aki ta krea un sirkulashon di e awa ku ta eliminá e situashon ideal pa sangura pone webu.
Gobièrnu ta sigui splika ku e departamento  di Obranan Públiko ya ta den proseso di pidi oferta na kompanianan ku por hasi e trabou di pòmp aki. Mientrastantu Departamentu di Technisch Hygiënische Zorg (THZ) ta keda vigilá e situashon diariamente i ta flit e área momentu ku esaki ta nesesario. Alabes Departamentu di THZ ke hasi uzo di e oportunidat aki pa informá siudadanonan rònt Kòrsou pa eliminá tur posibel situashon òf artefakto ku ta retené awa i asina kontribuí ku kombatimentu di sangura riba nos isla.