WILLEMSTAD.- Den dianan tras di lomba hues a dikta ku un hòmber hamaikino ku tabata keda di forma indokumentá riba nos isla, tin di keda ekspulsá konforme nos leinan, despues di tabata aki 10 aña i 6 luna. E hòmber a entamá un proseso kontra di e desishon di minister di hustisia pa su ekspulshon, pasobra e ke pa sak’é for di Kòrsou mand’é Bonaire, kaminda e lo kasa i forma famia ku su partner di 5 aña kaba. Den tur e kantidat di aña ku e hamaikino a permanesé di forma indokumentá riba nos isla, nunka el a hasi un petishon pa por hasi su status “legal”.
Dia 19 yüli 2020 e hamaikino ta keda detené riba sospecho di a kometé algun echo kastigabel entre otro menasa, homisidio, maltrato i poseshon di droga. Dia 29 òktober korte a seponer su kaso i a lag’é den libertat, sinembargo debí ku e ta di forma indokumentá riba nos isla, mesora a pas’é pa e departamento di imigrashon ku a kuminsá tende su ekspulshon for di nos isla.
Riba desishon di ministerio di hustisia, di 29 òktober, un luna despues, esta 29 novèmber mester a saka e hamaikino for di Kòrsou i mand’é su pais di orígen, pero el a entamá e kaso aki.
Loke a bin dilanti ta ku dia 29 yüli 2010 pa promé biaha e hamaikino a drenta nos pais komo turista i nunka mas el a bandoná regresá su pais.
Durante di e proseso suegra di hamaikino a entregá un karta na korte, kaminda ta pidi pa e hòmber por keda ekspulsá pero mand’é Bonaire. Pasobra e tin plan di kasamentu ku su partner di 5 aña.
E hamaikino lo no tin famia mas na Jamaica, debí ku su mama mes ta biba na Barbados, i su tata a fayesé. Pues e no tin famia na Jamaica. Su bida lo ta difísil.
Den luna di òktober e hòmber hamaikino lo mester a kasa, pero a posponé e kasamentu p’e luna aki.
E suegra a pidi korte pa duna e hamaikino un dispensashon pa motibunan humanitario. A pidi pa laga e hòmber hamaikino liber, di manera ku e por bai Bonaire pa keda ku un visa di 3 luna. Sinembargo hues no a honra nan petishon. Pues e hamaikino lo keda ekspulsá.