WILLEMSTAD.- Mirando ku reserva ofisial di divisa i kobertura di importashon ta na un nivel sólido i ku ekonomia di Kòrsou i di Sint Maarten a kuminsá duna señal di rekuperashon, Centrale Bank van Curaçao en Sint Maarten (CBCS) a disidí ku lo kuminsá eliminá, gradualmente, e suspenshon ku ta na vigor relashoná ku dunamentu di pèrmit di divisa, pa hasi transferensia pa eksterior. CBCS a introdusí e suspenshon akí na mart di 2020 relashoná ku e impakto ekonómiko fuerte di e pandemia di COVID-19. Entrante promé di òktober 2021, CBCS lo bolbe kuminsá duna pèrmit di divisa pa transakshon ku ta hiba na salida di divisa, pa suma te ku NAf 300.000. Manera kustumber, transakshon di kapital pa suma bou di NAf 150.000, por sosodé sin ku tin mester di pèrmit. Fuera di esei, lo introdusí sierto fleksibilisashon spesial pa asina e fondonan di penshun i kompanianan di seguro por hasi invershon den eksterior, i pa por hasi pago di dividendo i ganashi na persona no residente.

Mas informashon tokante e flèksibilisáshon ta disponibel den e siguiente dokumento riba wèpsait di CBCS: Easing of the suspension of the granting of foreign exchange licenses for transfers abroad1.

Si e rekuperashon ekonómiko keda stabil i reserva ofisial di divisa i kobertura di importashon keda na un nivel adekuá, lo introdusí un flèksibilisáshon mas dia 1 di yanüari 2022 i lo eliminá e restrikshon integralmente entrante 1 di aprel 2022.