WILLEMSTAD.- Despues di deklarashon di minister presidente Eugene Rhuggenaath di djasabra último direktiva di Asosiashon di Gruponan di Karnaval Kòrsou (AGKK) a keda aserka pa diferente karnavalista i tambe lidernan  di grupo di karnaval ku e pregunta ku selebrashon di karnaval 2022 lo por tuma lugá den su forma original.

Presidente di AGKK Henny Reinilia a bisa ku, Minister presidente Eugene Rhuggenaath a deklará ku entrante djamars 11 di mei eventonan na airu liber ta posibel pa mucha i hóbennan te ku 18 aña. Por lo pronto e eventonan aki mester tuma lugá sin presensia di públiko.

Tambe e minister a anunsiá ku djamars 11 i djabièrnè 14 di mei próksimo, lo bai tin un Asamblea Nashonal Bibando. Diferente gruponan di enfoke i interes lo keda invitá pa forma parti di un kombersashon, un diálogo pa krea perspektivanan nobo.

Teniendo kuenta ku paradanan di karnaval ta tuma lugá den airu liber i alabes di e splikashon duná dor di minister presidente Eugene Rhuggenaath di djasabra último, AGKK por dedusí, ku gobièrnu, ekspertonan i gruponan di interes konhuntamente por yega pa krea un perspektiva kaminda ta bai biba un bida mas normal atrobe.

Direktiva di AGKK próksimamente lo yama un reunion di miembresia general (teniendo debido kuenta ku reglanan di mantenshon di higiena i sufisiente distansia físiko). E reunion aki lo bai ta unu krusial i hopi importante pa por planifiká un plan bálido, basá riba konseho di gruponan di interes i reglanan ku gobièrnu stipulá p’asina yega na un posibel proposishon pa loke ta trata selebrashon di nos fiesta di karnaval 2022.