WILLEMSTAD.- Curaçao Biomedical & Health Research Institute (CBHRI) resientemente a kuminsá ku un investigashon profundo na e impakto di COVID-19 riba famia ku ta vulnerabel. CBHRI lo hasi e investigashon huntu ku Universidat di Kòrsou, di Aruba, di St. Maarten i di Utrecht (Hulanda). Huntu nan a organisá un webinar dia 19 di yüni. Durante e webinar a introdusí e proyekto di investigashon – ku tin un durashon di dos aña – ku ta yama ‘Upholding Human Rights in a Pandemic: the Social Impact of COVID-19 Measures on vulnerable families (COVIDCAS)’. Profesor dr. Ashley Duits ta investigadó mayor na CBHRI. Segun Duits e proyekto ta algu hopi spesial. E investigashon ta wòrdu finansiá dor di ZonMw, ku ta un instansia hulandes pa investigashon riba tereno di salubridat i inovashon den sektor di kuido. Segun Duits pa e promé bia ZonMw lo finansiá un investigashon Karibense ku diferente institutonan lokal komo doño di e proyekto. Banda di esei, segun Duits, koperashon entre CBHRI, diferente universidatnan den Karibe i un Hulanda ta algu spesial.
Durante e webinar, ku a keda guiá dor di dr. Tineke Alberts ku ta na kabes di departamento di Siensia Sosial di CBHRI, a duna mas informashon tokante e investigashon i kon e lo wòrdu realisá i ken lo forma parti di e tim di investigashon. Durante e webinar tabatin hende ku a partisipá for di Kòrsou, Aruba, St. Maarten, Hulanda, Anguilla, Trinidad i Merka. Banda di esei minister Ruthmilda Larmonie (Desaroyo Sosial, Labor i Bienestar) tabata presente, huntu ku minister-presidente di St. Maarten Silveria Jacobs.
Durante e investigashon sientífiko lo enfatisá riba e pregunta kiko ta e efekto di e pandemia di COVID-19, huntu ku e medidanan ku gobièrnu a instalá, riba famianan ku ta vulnerabel. Esaki lo wòrdu investigá for di e perspektiva di derecho humano i for di un aspekto sosial. Asina profèsòr dr. Ajay Bailey (Universiteit Utrecht) i dr. Benedicta Deogratias (Universiteit Aruba) a splika. Lo hasi mas o ménos 100 entrevista profundo. E entrevista lo wòrdu hasi na Kòrsou, Aruba i St. Maarten bou di gruponan di hende muhé, migrantenan, hende grandi ku entrada abou i tambe lo papia ku boluntarionan di Krus Kòrá.
Banda di esei lo hasi mas investigashon i lo reuní ku stipuladó di maneho pa asina haña un bista mas kompleto posibel.