WILLEMSTAD.- Minister di Salú, Medio Ambiente i Naturalesa interino sra Zita Jesus Leito  tambe a tuma nota di un video ku ta bayendo viral riba medionan sosial, kaminda por mira kon un dama ansiano ta kai.

Por a tuma nota riba e video tambe ku tin mas ku 1 persona huntu ku e dama den e lokalidat i nan no a hasi ningun intento mesora pa yuda e dama ansiano aki lanta bèk.

Tin tur indikashon ku esaki a tuma lugá na un kas di kuido di hende grandi den área pariba di nos pais.

E minister a enkargá mesora e Ministerio di Salú, Medio Ambiente i Naturalesa su departamento ehekutivo ku ta Departamento di Salú Públiko (G&GZ ántes GGD) pa inisiá un investigashon profundo pa determiná e kousa di e kaida aki i tambe e trato ku a keda ousente despues di e kaida. Extra a drenta den kontakto mes ora ku e minister di kual el a splika ku e ta hopi preokupá pa loke a sosodé. El a bisa ku awe e tim di inspekshon lo sali pa e sitio pa asina nan bai inspekshoná kiko ta pasando.

E minister a bisa ku e tambe por a skucha e sistema kon ta papia ku e otro  hende grandinan ku tabata den serkania. Segun e minister esaki no ta sistema pa trata nos grandinan i p’esei e lo no para ketu i ta laga investigá e kaso mes ora.

Pa e no ta konosí si e kas di ansiano enkuestion ta legal i ta kumpli ku tur e protokòlnan nesesario. Segun e minister ora e investigashon konkluí lo tuma e pasonan nesesario korespondiente na resultado di e investigashon aki ku probablemente lo ta sera e lugá inmediatamente.