WILLEMSTAD.- E siman aki dos invershonista ulandes a firma e último kontraktnan pa e proyekto ‘Pen Alley’, ku ta konsistí konstrukshon di 50 apartamento luhoso na Penstraat riba un tereno bashí banda di landhuis ‘De Goede Hoop’. Den e lanthùis lo bin un restorant di prestigio. Ta trata di un proyekto mionario. Lo habri porta di e restorant den no mas ku tres luna. E restorant lo karga e nòmber ‘Nultwintig’ i ta afiliá ku e restorant ‘212’ na Amsterdam, ku ta un di e “top” restorantnan na Ulanda. Shèfkòk di e restorant aki na Kòrsou ta Lars Keus, mènedjer di e restorant ta Eva Kolstee.

Asina EXTRA por a komprendé for di e dos invershonistanan ku ta Geert-Jan Wittens i Olav Kok. Ta trata di apartamento duradero i efisiente ku energia. Lo konstruí e apartamentonan via e konsepto di “app hotel”. Ku ta nifiká ku doño di e apartamento por biba den e apartamento pa un periodo. Den e periodo ku e doño no tei lo hür e apartamento ku otro hende. Segun e invershonistanan ku e proyekto Kòrsou lo konosé un otro invershon ku ta bon pa nos ekonomia i nos turismo. Segun e dos invershonistanan tin hopi interes na Kòrsou pa apartamentonan luhoso i restorantnan di prestigio. Tur e apartamentonan di Pen Alley ta luhoso i ku un superfisie minimal di 100 “vierkante meter”, dos kamber di drumi i dos baño.

Penn Alley lo ofresé tur servisio di un hotèl. Kompleho di apartamentonan lo tin un entrada sentral den e lanthùis ku resepshon i seguridat 24/7. Segun e doñonan e apartamentonan por fungi komo invershon. E invershonistanan tambe a kumpra un tereno na Penstraat ku por fungi komo espasio pa parker pa abitantenan di Pen Alley. Pa mas informashon por bishitá wèpsait: https://www.penalleycuracao.com/

...Riba potrètnan por mira impreshonnan di Pen Alley i tambe shèfkòk di e restorant nobo Lars Keus i mènedjer di e restorant ku ta Eva Kolstee...