WILLEMSTAD.- Na momentu ku e baha komo minister di finansa, e lo no drenta parlamento, Kenneth Gijsbertha a sirbi pais último 4 aña i manera el a bisa EXTRA e lo usa su konosementu pa guia hóbennan ku ke tuma over maneho di nos isla.

“Mi ta kontentu di a haña oportunidat pa a sirbi mi komunidat komo minister di finansa, agradesido mi a hasié ku kurason humilde i hustu tur momentu. Mi ta kontentu, maske kuantu reto tabatin, mi a keda para fuerte i den mi sapatu atendé tur trabou ku tabatin”, segun sr Gijsbertha den entrevista ku EXTRA.

El a bisa ku el a laborá na refineria Isla i a stòp dado momentu ora a pidi su persona pa por bai den e reto polítiko aki. Tur hende konosé den e mundu di deporte ku ta su bida for di chikí.

Awor aki una bes e terminá e karera aki komo minister, e ta bai tuma ratu di pouze, pa un fakansi i atendé sierto aspektonan.

“Mi no ta bai sinta ketu, mi no ta e persona ku ta sinta ketu, pero awor aki pa mi ta bai yuda hóbennan te kaminda nan ta deseá, ku su konosementu, pa nan por ta esnan ku ta ‘take over’ e totalidat di nos pais maneho di nos pais i pa mi mes, mi ta keda habri pa duna aporte aki i aya”, minister Gijsbertha a splika.

Tambe el a bisa ku e tin sierto idea i aserkamentu ku diferente empresa a hasi na su persona, pero e ta tuma trankilidat i awor aki sigur no ta pone su mes disponibel pa 8 ora òf mas tur dia. “Mi a sirbi sufisiente, mi yunan ta grandi i kaminda mi por duna nan sosten ku nan empresa lo mi konsentrá pero mas posibel lo mi sigui ‘enjoy’ mi bida normal. Danki Dios nunka mi a bandoná deporte i esei ta un di e ‘escape room’ nan pa mi sigui den e bida sosial i mi ta satisfecho ku loke mi a logra”, sr Gijsbertha a enfatisá.

El a sigui bisa ku e tin 50 aña ku partido MAN i 30 aña a bai elekshon. E último elekshon aki el a bisa ku ta e último ounke esei no ta nifiká ku sr Gijsbertha lo bandoná polítika. E lo keda pa duna su aporte i asta inkluso e gobièrnu nobo ku ta bai sinta awor aki, nan sa ku tur momentu por aserk’é.Tur esaki e ta hasié pa su pais.

Minister Gijsbertha ya a prepará dokumentonan di traspaso pa e gobièrnu nobo ku lo sinta. Dokumentonan pa indiká kiko e gobièrnu aktual a logra i kiko tin pendiente ainda. “Si nos no a logr'é komo minister mi ta spera e gabinete entrante i mi no tin duda, ku nan lo logr'é. Ta kosnan kla i ta parlamento so nan mester bai. I una bes esei ta kla, ta pais a logra. No ta mi persona pero ta pais a logr'é i mi ta deseá e minister entrante tur klase di éksito i forsa i wak bon pa nos pais”, sr Gijsbertha a terminá.