WILLEMSTAD.- Outoridatnan hudisial aki na Kòrsou no ta hasi wega i tin komo polítika ku ta aktua ku man duru kontra miembronan di gèng di otro paisnan ku ta trata di bin desbalansá e lugá aki. Tin atenshon kaba pa gèngnan lokal i tin nan basta bon bou di kontròl, i no ta permití pa esnan estranhero bin trata di remplasá nan. Asina fiskal mr. Bos a duna di konosé ayera mainta durante tratamentu di un kaso di sekuestro i homisidio kualifiká. Den e kaso aki un kantidat di 10 hòmber di nashonalidat venezolano a partisipá di un òf otro forma den sekuestro di un komersiante dje mesun nashonalidat ku e intenshon di ekstorshon’é, kita plaka, pa finalmente nan der’é na bida den un buraku na St. Joris.

Komo parti di su rekisitorio fiskal mr. Bos a deklará ku den paisnan Latino mas i mas por mira ku ta kometiendo e tipo di sekuestronan aki, pues sekuestronan di durashon kòrtiku unda ta ekstorshoná e víktima. Si hasi esaki den ménos dia ku ta posibel, e chèns pa nan ser detené ta bira mas chikí tambe.

Awor si tin di tira bista riba e situashon na Venezuela, pa hopi aña kaba e pueblo aki ta pasando den tempunan hopi difísil i ku esei e nivel di kriminalidat ta subi.  I no ta pòrnada e kapital di Caracas ta karga e nòmber di “kapital di asesinato”, i kasonan di sekuestro a para bira algu normal pasobra no tin e medionan pa investigá tampoko.

Segun mr. Bos, e tin di rekonosé ku tin un grupo grandi ku ta bini aki en buska di un mihó porvenir i un mihó perspektiva. Nan ta traha duru, pero lamentablemente tin otronan ku ta bini aki ku intenshon di establesé nan gèng i esei lo no permití. Den e kaso aki mes por bisa ku mitar di e akusadonan ta pertenesé na e gèng di Los Lobos i algun ta papia di Los Silenciosos. Ta gruponan ku ta sekuestrá hendenan, ku e intenshon pa kita plaka fo’i nan i eventualmente likidá nan. E sekuestro i asesinato di Angel Rodriguez den e kaso aki mes tabata unu hopi kruel unda ta dera un persona na bida en un buraku pa nan no ser denunsiá. Nunka promé Kòrsou a hañ’é konfrontá ku un  kaso asina, i pues ta kousa intrankilidat i angustia.

Aki na Kòrsou na aña 2003 komunidat a soportá no ménos ku 53 kaso di likidashon pa motibu di guera entre gèng, pero ku tempu esakinan a bin baha te na un mínimo. Tin atenshon pa gèngnan lokal, pero tampoko lo permití ku esnan djafó ta bin remplasá esakinan, i hustisia ta aktua ku man duru kontra nan.