WILLEMSTAD.- Lo bai tin un suavisashon pa loke ta instrukshon pa misa i kasnan religioso. Esei di akuerdo ku un anunsio di gobièrnu di Kòrsou. Tin un konsenso mundialmente ku a indiká ku por lo pronto ta evitá ku ta organisá evenementonan masal i ku aglomerashon di hopi hende. Pero den e kaso aki ta referí na evenementonan di karakter kultural, deportivo, artístiko, religioso, siensia òf un kombinashon di esakinan.

Den kaso di misa i kasnan religioso tin un suavisashon, i esei ta enserá lo siguiente:

Ta permití un máksimo di 50 porshento di e okupashon normal. Por ehèmpel si un iglesia ta tuma 200 hende, lo bai permití pa e okupashon ta di 50 porshento, pues lo permití pa 100 hende drenta sinta. Si e iglesia tin asiento pa 500 hende, anto lo permití pa 250 hende drenta.

Mas aleu lo tin di mantené distansia entre e hendenan ku no ta famia òf mesun grupo. Por ehèmpel si bo ta bai iglesia ku bo kasá i yunan, bosnan tur por sinta huntu. Na kas mes tur hende ta huntu, pues den iglesia tambe esei tambe lo mester por.

Hendenan ku no ta den e grupo òf no ta famia lo tin di mantené e distansia di 2 meter for di otro hendenan.

Es mas, na entrada di kada iglesia lo mester tin un òf mas persona ku ta duna indikashon unda pa sinta pa evitá aglomerashon. E tráfiko di hende paden lo mester tuma lugá di un manera efektivo pa evitá ku ta surgi aglomerashon na entrada di porta di misa.

Mas aleu kor i gruponan animá por presentá, pero bou dje kondishon ku e integrantenan ta mantené distansia sosial si.