WILLEMSTAD.- Teniendo na kuenta e aglomerashon na eventonan den wikènt ku a pasa, lo ta bon pa pensa den stimulá máksimo di hende den e tipo di eventonan aki.

Den wikènt tim Multidisiplinario a hasi 27 kontròl di kual 22 establesimentu tabata kumpli ku e reglanan di evento. Remarkabel si ku e wikènt aki tabatin vários sitio ku aglomerashon enorme. Tabata wikènt di fin di luna i organisadónan i promotornan a probechá pone nan fiesta den e dianan ei.

Hefe di Departamento Ekonómiko Ronny Cornelis:

Hefe di Tim Multidisiplinario Ronny Cornelis a konfirmá ku tabatin 27 kontròl di kual 22 a kumpli ku e reglanan di evento. Ta trata di eventonan ku ta kore riesgo haltu debí na aglomerashon serka nan.

A konstatá ku e eventonan a sòru pa kontròl, registrashon i atministrashon na porta. Tabata atministrá esnan ku nan karchi vakuna òf ku nan tèst Antigen.

Pa loke ta e kantidat di hende den e sitionan di evento, sr. Cornelis a bisa ku no tin un máksimo pa persona den e sitionan ei.

Pero remarkabel si tabata kantidat grandi di hende den e sitionan menshoná.

Tambe ta un echo ku no tin sanshon pa kontròl na porta, pero a mira esfuerso di promotor i doñonan pa kontròl mas efektivo na porta.

Kaminda a konstatá ku hende ke drenta di patras tambe e promotor i doñonan di evento a tuma medida i a pone dranghek. Konsekuentemente ta un satisfakshon tòg pa mira e esfuersonan di e promotornan.

Loke si tin sanshon i but ta si konstatá ku e trahadó no ta usa tapaboka miéntras ku esnan ku no registrá lo haña aviso verbal.

Un preokupashon grandi serka Ronny Cornelis ta e aglomerashon ku nan a konstatá. Ta eksihí na porta tèst Antigen òf e karchi di vakuna, pero e hende vakuná por drenta ku COVID i plam’é den e eventonan ku tantu hende asina ki.

I Cornelis su preokupashon ta ku no tin un máksimo di hende den eventonan aki. I p’esei e ta kere ku ta bon pa bai den e direkshon di un kantidat máksimo ku por drenta eventonan.

E ta satisfecho ku e organisadó i promotornan ta hasi nan trabou, pero e kantidat di hende ku ta bai e eventonan ei ta un preokupashon grandi.

“Nos tin di tene kuenta ku e Delta tei i nos mester wak mas kon ta protehá.

Nos pensamentu pa pone máksimo sino ‘sky is the limit’. Praktikamente ta den normal normal siendo e situashon no ta normal”, Cornelis a bisa EXTRA.