WILLEMSTAD.- Hopi di e kasonan ku ‘Stichting Slachtoffer Hulp Curaçao’ (SSHC) ta trata ta basta kompliká. Pasobra den hopi kaso e no ta trata di maltrato relashonal so. Asina Milouska Everitz di ‘Stichting Slachtoffer Hulp Curaçao’ (SSCH) a bisa djaluna mainta durante reunion di komishon sentral di parlamento di Kòrsou. Durante reunion tabata atenshon pa ‘kasonan di maltrato doméstiko na Kòrsou’.
Relashoná ku e kasonan di maltrato relashonal hopi bia e víktima no tin trabou, no tin kas pa biba, Everitz ta splika. ‘Tin hopi kosnan sosial ku ta bin aserka. Ku ta hasi e kasonan awendia hopi kompliká.’
Den un presentashon kòrtiku direktor Everitz a splika ku ‘Stichting Slachtofferhulp’ ta yuda hende ku a bira víktima di abuso relashonal. ‘Nos ta papia tokante abuso relashonal ora e agresor i e víktima ta famia di otro, por ehèmpel tanchi òf tio. Òf si e agresor i e víktima tin òf tabatin un relashon amoroso. Pero tambe ora un bon amigu, manera un ‘amigu di kas’, ta enbolbí.’ Banda di esei Everitz a splika ku tin diferente tipo di abuso: abuso físiko i abuso emoshonal. ‘Pero awendia tambe tin e situashon ora tin un persona ku a bin for di pafó i ta keda ku un antiano. Tin kaso ku e persona ta keda soportá tur sorto di maltrato dor di e persona ku a firma p’e.’
Everitz a splika ku mayoria di e kaso ku SSHC ta haña ta bai via di polis. ‘Stichting Slachtofferhulp’ ta traha 24 ora pa dia. Trahadónan di ‘Slachtofferhulp’ na promé instansia ta papia ku e víktima, pa wak kiko ta pasando. Si e kliente ta hasi un petishon pa yudansa SSHC ta traha un plan pa ku e kliente. ‘Tin kliente ku tin ku bai ‘shelter’, esaki si ta trata di un kaso peligroso i ora e persona ta pidi pa e por bai ‘shelter’. Den e ‘shelter’, ku ta un kas na Kòrsou, e por skonde te ora ku polis detené e agresor. Despues e víktima por bai bek na su mes kas.’
Everitz a splika den komishon sentral ku na e momento aki na Kòrsou tin ‘shelter’ pa hende muhé so. Hende muhé por bai huntu ku nan yu. ‘Lamentablemente nos no tin ‘shelter’ pa hende hòmber. ‘ Everitz ta kere ku lo ta algu bon pa wak den futuro pa krea ‘shelter’ pa hende hòmber tambe.