Extra a entrevistá dos korporal Yu’i Kòrsou riba barku Zr.Ms. Tromp

WILLEMSTAD.- Barku di Marina Hulandes Zr.Ms. Tromp riba djaluna 26 ougùstùs a mara na Willemstad. Zr.Ms.Tromp ta un di e kuater fragatanan di komando i defensa aéreo di Marina Real ku 200 miembronan di tripulashon na bordo. Bou di nan tin dos yu’i Kòrsou: korporal Brahim Varlack (33) i Gyljomar ‘Gio’ Job (27).
Extra a papia ku e dos Yu’i Kòrsou tokante nan bida riba un barku i tambe tokante e biahe spesial ku nan a hasi e aña aki.
Ámbos Varlack i Job a splika Extra ku nan ta gusta nan trabou hopi. Varlack: “Tur dia ta interesante. Semper tin trabou. I banda di esaki bo ta mira hopi di mundu.” Job ta splika ku e ta kontentu ku el a skohe pa e trabou ei. E ta spera ku mas Yu’i Kòrsou ta djòin Marina Hulandes. “Defensa semper ta buska bon hende. E trabou ta hopi dushi.”

Ta 12 aña pasá ku e fragata di komando i defensa aéreo tabata na Willemstad pa un bishita den waf. Pa Zr. Ms. Tromp Kòrsou ta e último waf ku e barku di Marina ta bishita promé ku e bolbe bek Hulanda despues di un biahe ku a dura seis luna. E biahe, ku e nòmber Pacific Archer, ta den e lus di desaroyo di seguridat i stabilidat den Oséano Pasífiko, fortalesimentu di koperashon internashonal, promoshon di siguridat marítimo i e apoyo di kumplimentu ku e leinan i regulashonnan internashonal riba laman. Durante e biahe aki e barku di Marina a traha den estrecho kolaborashon ku aliado i sosionan i a partisipá den vários ehersisio internashonal, inkluyendo e ehersisio marítimo mas grandi RIMPAC na Hawaï. Ademas di ehersisionan e barku a keda tambe desplegá na un paso liber na Laman di China Sur, i den e Bab-El-Mandeb, kontra di atakenan di parti di Houthi. E biaha e kuminsá na Den Helder, atrabes di Laman Mediteráneo nan a nabegá bai Pasífiko Indio i atrabes di region Karibe e barku lo bai bek direkshon kas.
Varlack ta splika ku pa un luna largu Zr.Ms. Tromp tabata presente den Mar di Shon (‘Rode Zee’) pa protehá otro barku kontra atakenan di Houthi. “Pa un luna largu tur hende riba barku tabata di focus. E trabou no ta fásil i tambe tin tenshon. Houthi por ataká nos barku. Pero esaki ta nifiká ku bo mester ta prepará pa tur kos. E tenshon no tabata fèrfelu. Bo sa ku bo ta hasi un trabou importante i na final tur kos a bai bon.”

Job ta splika ku despues di esey, e barku tabata riba laman pa tres siman largu i despues a mara na haf di Mumbai, India.
“Tambe nos a mira Singapore, Vietnam Surkorea i hopi pais mas. Nos a mira hopi siudat i pais spesial. Esaki ta hopi interesante.”
Despues di seis luna, pa Varlack i Job ta hopi spesial ku nan a mara na Kòrsou. E dos yu’i Kòrsou a bishita famia i disfrutá di e pais. “Despues nos ta bai Hulanda. Na nos otro kas”, Job ta bisa ku un sonrisa grandi.