Prof. Wouter Veenendaal ke hasi enkuesta

WILLEMSTAD.- Te ainda no ta konosí kiko ta opinion di abitante di Hulanda Oropeo tokante Reino. Prof. dr. Wouter Veenendaal ke hasi un enkuesta sientífiko pa investigá kiko ta opinion di hulandesnan. Den e enkuesta e tambe ke investigá kiko abitante di Hulanda sa presis tokante Reino i parti Karibense. Segun Veenendaal esaki ta interesante for di un punto sientífiko. “Hopi hende tin hopi preposishon, pero nos no sa opinion di pueblo. Tampoko nos no sa presis kiko hulandes sa tokante e parti Karibense. Kasi 20 aña pasa partido PVV a hasi un investigashon, pero nos no sa si esaki tabata hopi ophetivo.”
Asina Veenedaal a bisa durante un charla ku el a duna 23 di òktober na Universidat di Kòrsou Dr. Moises da Costa Gomez (UoC). Tema di e charla tabata ‘Demokrasia den Reino di Hulanda’. Prof. dr. Wouter Veenendaal ta un profesor ekstraordinario di Relashonnan den Reino i ta dosente prinsipal di polítika komparativo na Universidat di Leiden.

Durante su charla Veenendaal a enfoká riba demokrasia den Reino di Hulanda. A duna atenshon na e struktura kontroversial di e Reino, ku ta konsistí di kuater pais outónomo i igual, pero ku Hulanda ta polítikamente superior kompará ku e otro.
Segun Veenendaal ta eksistí un Konseho di Minister di Reino, pero no ta eksistí un Parlamento di Reino. Ku ta un défisit. Veenendaal den e charla a papia tokante e posibilidat pa krea tres asiento èkstra den parlamento hulandes pa paisnan Karibense di Reino Hulandes. Te ainda e paisnan no ta representá, ku ta un ‘défisit demokrátiko’, segun Veenendaal.
Promé parti di e charla a konsentrá riba efektonan di tamaño di poblashon riba polítika i demokrasia, ku un enfoke spesífiko riba polítika den estado i área chikí (isla). Veenendaal a hasi investigashon den isla chikí rònt mundu, inkluí e seis isla karibense ku ta parti di Reino di Hulanda.
E partí aki di e charla a demostrá kon i dikon isla chikí ta karakterisá pa relashon serká entre elektornan i polítiko, polítika basá riba persona, polarisashon, klientelismo, i un tendensia pa konsentrá poder.

Despues di charla públiko presente a debatí ku Veenendaal den oula di Universidat.
Extra a hasi entrevista ku prof. dr. Wouter Veenedaal. Por wak e entrevista riba Internet: https://www.youtube.com/watch?v=BhmvpfAZ_50