WILLEMSTAD.-No mester sorprendé niun hende ku tin mas kaso di hendenan ku ta keda infektá ku Corona vírus na Kòrsou den e tempu aki. Tene kuenta ku a limitá medidanan, a habri konekshon ku otro islanan den Reino i tambe Ulanda. Pa loke ta trata e kaso nobo ku a keda anunsiá, esta di un mucha na skol di fundeshi ku tambe a tèst positivo pa Covid, dr. Izzy Gerstenbluth a splika awe mainta ku ta solamente e bon amigunan di e mucha ta esnan ku lo bai tèst. Ta esnan ku ta huntu ku e mucha, papia, hunga huntu etc so ta keda konsiderá komo ‘close contact’. Pa e otronan e riesgo ta hopi abou.

Dr. Gerstenbluth den su splikashon a insistí ku den dianan benidero no ta nada straño ku lo bini mas kaso positivo di Covid. E vírus ta bini di un kaminda, pero niun hende no sa di unda i komo tal e ta keda infektá mas hende i p’esei mester trata na kontené. Tin modelonan di eskalashon desaroyá pa den kaso ku e kantidat di kasonan sigui subi lo pasa pa fase 3. Parti di fase 3 ta enserá ku lo bolbe instalá ‘toque de queda’.

Hopi pregunta di ayera nochi pa awe relashoná ku e kaso di e mucha na skol. Gerstenbluth a duna di konosé ku hendenan ku no tin kontakto kontinuo i frekuente ku e mucha no tin motibu di prekupashon pasobra e riesgo ta hopi abou. Ta konsiderá e mucha su mihó amigunan i kisas un wela òf otro famia ku ta brasa i karisia e mucha hopi i tur dia. Ta den e prome sirkulo ta tèst i si den e grupo ei hendenan no tèst positivo lo laga e tèstmentu te einan. Tin un rapòrt di World Health Organization ku ta indiká ku e chèns pa un mucha infektá un adulto ta hopi chikí. Di otro banda e chèns pa un hende grandi informá un mucha ta mas grandi.

Gerstenbluth ta sigui ripití pa tene distansia, evitá sitionan ku aglomerashon, muzik duru kaminda hendenan mester papia i grita pasobra esei ta lugánan unda por plama e vírus mas lihé. Mas detaye den edishon di EXTRA.