WILLEMSTAD.- Ofisina di Turismo di Kòrsou (CTB) ta spera ku e aña aki kantidat di turistanan for di Colombia lo sigui subi. Na nòmber di CTB André Rojer a bisa e wèpsait di Suramérika ‘Rèport News’ ku ámbos e kompania di aviashon Avianca i tambe Wingo lo ekspandé e frekuensia di nan buelonan entre Colombia i Kòrsou. Rojer a splika ku promé ku fin di òktober Wingo lo kuminsá ku dos buelo pa siman. Promé ku fin di novèmber Avianca lo ekstendé su buelonan na Kòrsou. Tambe Copa Airlines, ku ta un kompania di Panama, lo oumentá e frekuensia di nan buelonan na Kòrsou. Rojer ta kontentu ku lo tin mas konekshon entre Bogotá i Kòrsou. Banda di esei durante e aña aki lo tin mas konekshon entre Kòrsou i Barranquilla, Cali i Medellín. Rojer ta kontentu ku e desaroyonan positivo. E ta bisa ku pa Colombia e merkado di Kòrsou ta hopi interesante. Na otro banda tin hopi hende na Kòrsou ku ke bula na Colombia. Na e momento aki gobièrnu di Kòrsou a kualifiká Colombia komo un pais ku riesgo abou.
Kòrsou a risibí riba 34 mil turista di estadia na yüli. Mayoria di nan ta di for di Hulanda (22.249 persona). For di region di Sur Amérika un total di 1.532 turista di estadia a bishitá Kòrsou, 39% ta prosedente di Colombia.