WILLEMSTAD. - E siman benidero Ministerio Públiko Kòrsou tin vários kaso den Korte programá ku por hala atenshon, sigur pa nan seriedat i shòk ku nan a kousa den komunidat.

Djárason 8 di febrüari Ministerio Públiko ta bai trata den Korte e kaso di dòbel asesinato den sèptèmber 2016 den diskotèk The Alley den Punda komo tratamentu “pro-forma”. E dia aki 1 sospechoso lo ta den Korte, ta trata di e hòmber sospechoso mayó C.M. Ta trata di e kaso na unda Jurick Hooi i Karoushaney Martina a pèrdè nan bida

Djárason 8 di febrüari 2’or Fiskal ta bai trata e kaso di Apòstel O.B. di forma “pro-forma”. Di tres biaha ku e kaso aki di violashon seksual ku vários víktima ta ser tratá komo “pro-forma”

Mester indiká ku den siman tras di lomba, Hues Komisario tabata hopi okupá ku tendementu di testigunan ku por sierto a trese nan historia dilanti i mester indiká ku e historianan ta hopi pisá ku ta laga esnan okupá ku e investigashon ku sintimentunan di importansia, ya ku ta echonan ku a tuma lugá.

Djárason 15 di febrüari ta bai trata e kaso di asesinato di Franky Ignacio (kaso BlueBay) ku kontenido. Ta trata di un kaso ku a ser tratá na vários okashon komo “pro-forma” pero awor si ta bai keda tratá ku kontenido. Kuater sospechoso, tur ta aktualmente será, mester presentá den Korte

Djárason 22 di febrüari Ministerio Públiko ta bai trata pa promé biaha e tripel asesinato riba lugá pa stashoná outo di Campo Alegre. Tratamentu ta di forma “pro-forma”. Den e kaso aki tin 4 sospechoso, nan ta: D.L., D.F., R.C. i C.M.

Djabièrnè 24 di febrüari pa 2 or e sospechosonan D.L., D.F., R.C. i C.M. ta bin Korte atrobe, e biaha aki pa un asina yamá “regiezitting” pa plania e kaso i pa skucha si tin mas deseo pa mas investigashon di parti di e partidonan envolví.