WILLEMSTAD.- Resientemente Minister di Salubridat, Medioambiente i Naturalesa, sra. Zita Jesus-Leito, a duna kontesta riba preguntanan ku parlamentario sr. Gilmar “Pik” Pisas a hasi algun tempu pasá enkuanto e desishon pa yega na un plafònt pa spesialistanan den kuido. Den su karta sr. Pisas a kuestioná e kantidat i skarsedat di spesialista di wowo ku tin aktualmente. Den esaki tin problema ku lista di espera pa motibu di tantu hende ku tin problema ku bista.

Den su kontesta e minister ta bisa ku e ta na altura di e listanan di espera. Algun di e tratamentunan pa kua tin tempu di espera por keda konsiderá komo médikamente responsabel, ku ta e tratamentunan elektivo.

Mas aleu e ta bisa ku, un di e aspektonan ku mester atendé den e kuadro aki ta di tuma mas spesialista di diferente disiplina den servisio di CMC, manera por ehèmpel urologia, oftalmologia i nefrologia ku lo keda implementá den konsulta entre CMC, SVB i gobièrnu. Spesífikamente pa loke ta trata spesialista di wowo CMC ta hasi trámite pa tuma mas di nan den servisio di CMC riba término kòrtiku.

Mas aleu tambe den 2017 a introdusí un kambio di maneho ku ta hasi midimentu di wowo posibel sin intervenshon di un spesialista di wowo, pero e optometrista mes por hasi esaki. Ku introdukshon di e límite di produkshon ta spera ku e kuido aki lo pasa pa e proveedor di kuido mas apropiá ku ta e óptika.

Tambe sr. Pisas a kuestioná e maneho di redukshon di gastu i su konsekuensianan pa e kuido. E minister ta kontestá bisando ku pa a yega na e maneho aki kon pa yega na redukshon di gastunan den kuido, a tene kuenta ku e aksesibilidat i kalidat di kuido pa pashènt. Esaki sin mester yega na subida di prima di seguro básiko (BVZ). E límite di produkshon pa spesialistanan médiko no por keda konsiderá komo un medida isolá.

E ta forma parti integral di un pakete di reformanan den kuido ku e meta pa mantené e kuido aksesibel i sostenibel riba término largu, spesialmente via e kalidat i infrastruktura ku CMC ta ofresé.

Pa loke ta solushon pa e problema di spesialista di wowo e mandatario a splika ku lo tuma mas spesialista di wowo den servisio di CMC riba término kòrtiku.