Faneyte: No tin bista ken a okashoná e situashon aki

WILLEMSTAD.- E LOK (lei nobo di e-gaming) ku a bai di akuerdo kuné na desèmber 2024, no a logra sòru pa plaka di lisensia pa e-gaming yega den kaha di gobièrnu, ku otro palabra pa pueblo di Kòrsou. Banda di esaki e LOK no a evitá tampoko ku kompanianan ku ta operá ku lisensia otorgá pa Kòrsou ta sigui daña reputashon di Kòrsou internashonalmente. E kompanianan (casinonan oline) aki no ta kumpli ku nan klientenan òf tampoko ku leinan di e paisnan kaminda nan ta operá.

Asina kolaboradó di frakshon di PAR den Parlamento ta deklará. Motibu dikon no e LOK no a logra den su metanan prinsipal, esta di trese mas sèn aden pa pais, ta pasobra den e struktura nobo ku e LOK a krea e sènnan ku ta kolektá pa e lisensianan ku ta otorgá no ta drenta riba un kuenta bankario aki na Kòrsou. “Mi ke pa hopi hende komprondé esaki hopi bon”, Faneyte ta bisa.

Na momento ku e LOK a pasa i a instituí e struktura nobo, Gaming Control Board (GCB) ku ta e entidat ku ta kontrolá e sektor di gaming mester a habri un kuenta bankario na Kòrsou pa risibí pagonan. Esei ta loke e LOK ta preskribí. Pero, den realidat, Faneyte ta bisa, ta resultá ku a habri un kuenta bankario serka un asina yamá “payment service provider” na Repúblika Cheko riba nòmber di gobièrnu di Kòrsou.

Pero, ta un persona deskonosí a habri e kuenta bankario aki, pues no gobièrnu di Kòrsou. No sa tampoko ta ku ki intenshon e persona aki a habri e kuenta bankario, Faneyte ta sigui bisa. Esun ku tin ku risibí sèn pa estado ta Ontvanger, pero e kuenta di banko pa risibí e sènnan no ta na Ontvanger ni na GCB ku ta un zbo (“zelfstandig bestuursorgaan”) instituí pa gobièrnu.

Faneyte ta splika ku ta ontvanger ta esun enkargá ku supervishon riba entrada den kaha di gobièrnu i ta un interogatorio hopi grandi p’e dikon den kaso di e LOK no a regla esaki. Banda di esei e kolaboradó di frakshon di PAR ta sigui bisa ku tin un “wallet” riba kua GCB ta risibí pagonan den moneda digital. Ounke GCB ta pone esaki riba su fakturanan no sa tampoko di ken e “wallet” aki ta, ni ta kuantu sèn ta drenta den e “wallet” digital aki.

“Pues, no tin supervishon di e sènnan ku ta drenta for di eksterior. No sa ken tur ta paga ni kuantu sèn ta paga. No por kontrolá tampoko ku e 15 mion ku gobièrnu a bisa a drenta for di e LOK ta e sèn total ku realmente a drenta.”

Banda di esaki Faneyte ta bisa ku un kondishon legal ku un kompania (casino online) mester kumpli kuné ora e pidi un lisensia pa operá na Kòrsou ta, ku e mester habri un kuenta di banko na Kòrsou. Pero, den realidat ta mira ku e kompanianan a haña un lisensia temporal di 1 aña sin ku nan a habri un kuenta bankario lokal. Ta pasa den hopi kaso ku asta despues ku 1 aña pasá no ta kumpli tampoko ku e kondishon aki i nan ta sigui drei numa.

Pa e motibu aki Faneyte ta bisa ku mester ahustá e LOK. “Tambe tin un ordenansa di lei ku ta regla ‘digitale activa dienstverleners’ ku ta indiká bon kla kiko esnan ku ta duna servisio di pago mester kumpli kuné. Entre otro nan mester tin un lisensia di Kòrsou.”

Faneyte ta splika ku ta pa tur e motibu aki e sèn no ta yega serka e pueblo di Kòrsou pasobra no tin supervishon. “Esaki ta un lástima pasobra hopi di e entradanan aki por usa pa otro kos, manera a bende e pueblo di Kòrsou tambe. Por ehèmpel pa oumentá AOV, pa enseñansa, pa salubridat i hopi kos mas.”

Faneyte ta finalisá bisando ku no tin un bista ta ken a kousa e situashon aki.