WILLEMSTAD.- Un koredó di Quad a rabia ayera mainta na lokal di kùr na momentu ku a presentá ku yen di regla pa kùr su Quad. Sinembargo e reglanan aki no ta eksistí den ningun lei.

Ayera e koredó di Quad a presentá ku su vehíkulo pa kùr esaki. El a haña karta na kas pa riba e fecha di 19 di yanüari 2017 e akudí pa kùr su ko’i kareda. E shofùr a paga i para nechi den rei.

Ora a yega su turno, a bisé ku no ta kùr Quad. A saka un lista indikando yen di adaptashon pa e Quad manera brek na kada man, seatbelt, sistema di bèk e vehíkulo, sistema di lusnan manera di outo etc. Segun EXTRA por a komprondé mas di 20 punto riba papel.

E shofùr a rabia, pasombra niun kaminda, ni tampoko a duna publisidat dje kambionan pa un Quad.

Ademas ora a manda karta p’e kùr e Quad no a notifik’é tampoko dje kambionan.

Ora e shofùr a pidi mas splikashon i tambe presensia di direktor, niun hende no por a presentá pa aklará kon bin awor diripiente tin mas di 20 punto dor di kual e no por kùr su vehíkulo.

E shofùr a rabiá asina tantu, ku el a disidí kue dos di su vehíkulonan ku tambe tabata para pa kùr, blòkia entrada pa bai kùr.

E momentu ei, a yama polis p’e shofùr i tambe hefenan a akudí na e sitio. A resultá ku e reglanan ku ke a imponé riba e shofùr no ta eksistente, no ta para den lei. E reglanan aki lo a keda diskutí den un komishon ku ta atendé asuntu di Quad i bròmernan, pero no tin nada konkreto pa kambio di Quad.

Despues di intermediashon di polis i ku a ripará ku enberdat e reglanan no ta eksistente, e shofùr por a pasa pa kùr su Quad. Sinembargo, e no a pasa e kùr pa algun desperfekshon chikí. E koredó tin di akudí atrobe pa kùr su vehíkulo.