E siman aki a estrená den The Movies na Punda, e dokumental Churandy – de Eindsprint. Un proyekto ku tabata un soño di Thakai Doran i ku ta bira realidat. Ku hopi entusiasmo i mas ainda mirando e reakshon durante i estreno di e dokumental, Thakai a konta Djasabra di su soño i ku nos tin di keda pendiente pa muchu mas. Manera el a bisa, esaki ta e promé stap ku a habri e kaminda pa muchu mas keda hasí pa nos atletanan.


Super orguyoso

Mi ta super orguyoso Thakai a bisa Djasabra. Segun el a konta, ta un idea ku e ta kana kuné for di 2016, despues ku Weganan Olímpiko a kaba na Rio i e atletanan a bin Kòrsou, el a bende e imágennan ku UTS pa por a hasi propaganda kuné. Aki Thakai a kuminsá eksperensiá nan mas di aserka. “Tin hopi di konta akinan pero nos no sa di esaki. Nos sa solamente ora Churandy a kore 100 meter i LieMarvin a kore 100 meter i no sa e struggle nan tras”. Thakai a haña sa ku 2020 lo ta Churandy su último Weganan Olímpiko. Tambe el a eksperensiá Churandy e tempu di Komité Olímpiko antiano i e euforia na 2008 ora el a gana i a pèrdè na mes momentu komo el a trapa riba e strepi. Konosiendo deporte, Thakai por bisa ku loke Churandy a hasi, den e region aki ta masha poko hende a hasi. Un hende ku a para 3 bia den final kontra Usain Bolt den Weganan Olímpiko, ta tres wega olímpiko ku ta 12 aña den tòp konstantemente, por konkluí ku e kos aki mester haña mas atenshon.

E realidat

Durante di e añanan ku a sigui, despues di 2016 Thakai a purba hopi i el a haña hopi no i seis luna promé ku Weganan Olímpiko, el a topa un Rob Jansen di Wasserman. Ta un persona ku na Hulanda ta grandi den deporte i e ta agente di hopi deportista. Rob Jansen ta biba na Kòrsou. Durante di sierto trabou ku Thakai tabata hasi el a topa Jansen riba kancha di gòlf. Einan a start un kombersashon, ku a bira un enkuentro ku kòfi i di einan Thakai a haña e oportunidat di konta tur su ideanan. Jansen a puntr’é pa skibi su ideanan riba papel i e lo manda nan pa su kompania. Thakai mester a topa ku trahadónan di Jansen na Hulanda ora el a bai graba. Durante di un kaminata di 2 ora den haf di Rotterdam, a surgi e konekshon i asina e pelíkula di Churandy de Eindsprint a bira realidat.

 

E dokumental

Pa loke ta e dokumental; por sera konosí ku e bida profeshonal di Churandy tras di kortina. E 20 aña den tòp, e partinan dushi, kon e ta hasi komo atleta i alabes dediká tempu na su yunan, e aspekto di ta un tata pero tambe konektá ku mundu, konektando Hulanda i Kòrsou, e ta un ‘role model’ i kon e ta dil ku e situashon ei. Tambe por mira kiko ta bai pasa despues.  Weganan olímpiko ta su último òf e lo sigui. Churandy tin un soño i esei ta e ke kaba na kompetensia mundial na Merka otro aña. Einan e tim di 4 bia 100 meter lo partisipá i einan Churandy ke sera su karera. El a pasa su bida deportivo na Merka promé ku el a bira profeshonal. Den 53 minüt lo sera konosí hopi di aserka ku Churandy Martina.

Emoshonante

Hopi bia ta tende di Churandy ora tin kompetensia, kaminda e ta tuma parti. Relashoná ku esaki Thakai a bisa ku e mes ta bin di e famia olímpiko i e tabata mira i tende hopi di Churandy. Pero ora e tim a bin di Ulanda i  Thakai a bai Churandy su kas, e mama a habri un kashi “mi kurpa a kue ‘kippevel’. Mi a bira emoshoná pasobra mi no a mira asina tantu logro di Churandy for di dia el a kuminsá, te ku su último añanan di komité olímpiko antiano. Mi a keda sorprendé pasobra ta un hòmber grandi esaki ta”, segun Thakai. Tambe el a mira kon na Hulanda ta elogiá Churandy. Por a mira e último Weganan Olímpiko kaminda el a karga e bandera i por a tende kon ta elogiá i gaba Churandy. “Nos mester ta hopi orguyoso di un hende asina aki, ku a dediká su tempu kompleto na atletismo, pa inspirá nos tur den bon i den malu.  P’esei algu mester sali afó, mester hasi algu. I esei ta loke mi ta trese awor aki den e dokumental”. I alabes ku esaki tambe Thakai a bisa ta yuda Churandy realisá su último soño, pa e terminá su karera i su último kompetensia na yüli 2022.

 

Sigui perseverá

Tur dokumentario sa tin un mensahe su tras, pa loke ta esun di Churandy, Thakai a bisa ku mester sigui perseverá i ni maske kiko pasa, si bo pone un meta bo dilanti bai pe. E kaminda no ta règt i si wak den kaso di Churandy, por mira kon el a kané. For di hóben el a pone e tatuahe di e 5 renchinan na su man i el a bisa di ke yega 5 wega olímpiko. I dor di bon i malu el a yeg’é tambe. I asta ku a skùif e Weganan Olímpiko ku un aña debí na Corona, Churandy a saka e motivashon pa rèk su bida deportivo un aña mas. Churandy tin un poder mental, meskos ku e otro atletanan. E poder mental aki ta asina grandi i p’esei e pelíkula ta un inspirashon pa sigui desaroyá e poder mental aki.


Un ehèmpel i un inspirashon

E premier tabata den siman aki. Intenshon tabata pa el a keda presentá durante di 2 dia pa públiko pero esaki no a sigui. Pero pa esnan ku ke wak e dokumental por aboná riba Videoland. Lo hasi e premier riba Videoland ku famia di Churandy. I pa skolnan si tin chèns pa hóbennan wak e na Kòrsou fin di sèptèmber, pasobra Churandy ta un ehèmpel i un inspirashon. Tambe lo bai tin chèns probablemente pa The Movies kumpra e derechi di e pelíkula pa por pas’é pa públiko.

 

Balorá mas

Despues di 10 di òktober 2010 Churandy su kompetensianan tabata bou di bandera di Hulanda. Thakai ta haña ku hóbennan den e kaso aki manera Churandy no ta keda balorá manera mester ta. Na Kòrsou ta papia hopi pero mester balorá nos héroenan mas. “Nos ta malu den dokumentá kiko baluartenan a hasi òf laga di hasi.  Mi ta mir’é asina’ki, na skol nos ta haña geschiedenis pero esei ta di Oropa, pero nos no ta haña e historia di por ehèmpel baluartenan di Kòrsou manera Rina Penso, Rudy Plaate. Historia di deportistanan ku a presta, ku a marka pouta, ta parti di nos kultura. Nos kultura ta ku nos ta bon bailadó, nos ta bon den músika, arte i deporte pero lástimamente e kuater pilarnan ei masha poko ta haña ku tin dokumentario di nan. Pa un mucha di awendia, e ta preferá mira un video ku lesa i p’esei mas nos pone esaki mas nos ta hinka den e hende su mente, ku bo mester ta orguyoso di bo hendenan di pasado”, Thakai a bisa.

 

Churandy a habri e porta

Thakai ta kere ku mester pone mas atenshon na nos atletanan i no ora di kompetensia so. Churandy a habri porta pa hopi i p’esei ora nan ta afó sostené nan, manda mensahe. Churandy tabatin e suerte ku tabatin dos kompania ku un struktura basta sólido su tras.  Tabata e tempu ei UTS i komité olímpiko antiano i despues Churandy a haña CWM, ku a duna sigur te ku Tokyo i pasa Tokyo. Esaki ta algu masha importante pa un atleta, pasobra ku e tiki ku e ta haña na Hulanda, e no por sobrebibí e mundu profeshonal. I e dokumentario mes tambe a keda paga pa un kompania hulandes. Thakai a purba pa Kòrsou, pero aki no wak e importansia. E ta hopi gradesido pa e kompania hulandes Wasserman ku a dun’é un push, pa hasié ku Churandy. I awor por mira ku ta sektor privá ta sostené e proyekto di skol pa asina duna e posibilidat pa hóbennan por wak e dokumentario. Thakai ta spera ku mas kompania lo invertí mas den arte, músika i kultura. No por krea un hende ku ta dòkter i abogado so, nos tin hopi hende ku ta artístiko i ta esei ta e manera ku nan ta biba nan bida. I e artista, músika òf deportista aki por biba den eksterior i sigui desaroyá su pashon. I ora deskubrí e pashon aki no tin nada pa kibr’é. Nos isla ta chikí i no tin e espasio pa desaroyá e pashon fásilmente i mester buska un lugá mas grandi. Esnan ku ta sabí i ku por pone un tim bon rondó di nan por bira mionario pero mayoria di nan ta biba pa e amor, e sabor ku tin paden ku ta duna nan e energia tur dia pa sigui hasi loke nan mas ta gusta.

 

Sosten di famia

Churandy tabatin bon sosten di su famia; su mama, tata, ruman, den un palabra e base di su edukashon tabata unu fuerte i bon ku a form’é pa e persona ku e ta awe. E ta un persona masha trankil i reservá.

 

Di dos parti

E dokumental di Churandy ta 53 minüt. I ora e terminá su karera lo bai tin un di dos parti. Thakai no sa kon ni di ki manera, pero lo mester klousurá e karera di Churandy. Thakai a bisa ku e tin hopi aña tras di e atletanan inkluso Churandy i algu ku no ta para ketu na dje ta na 2019 e siudat na Merka Claremont, a deklará 9 di òktober komo dia di Churandy. Pa un siudat dun’é e yabi di e siudat, ya kaba mester kuminsá pensa ta kiko e persona aki a hasi. Esaki tambe a keda graba na 2019 i ta den e dokumental. Thakai na yüli 2022 ke tei ora Churandy sera e kapítulo aki di su karera deportivo.

Homenahe

Thakai a bisa ku tin mas deportista ku meresé e homenahe aki manera Churandy. E mes tin algun idea ta kana kuné i e ta kreando eseinan pa asina por buska e plataforma pa duna homenahe na nan tambe.  Thakai a bisa ku pa produsí un pelíkula mester buska un plataforma pa finansiá esaki i kon ta bende na klientenan. Den kaso di e dokumental ku ta bai ta riba Videoland, Thakai a bisa ku ta un plataforma ku 1 mion hende inskribí.

 

Sosten lokal

Pa loke ta e sosten pa e tipo di proyektonan aki, Thakai ta deseá pa lokalmente por sostené e tipo di proyektonan aki. E ta spera ku kisas asta parsialmente por haña e sosten aki na Kòrsou i pa sobrá buska afó. E ta importante pa nos kultura i pa nos futuro, mira e tipo di dokumentalnan aki. I esnan ku ke kooperá por tuma kontakto ku Thakai Doran.

 

LAGA UN KOMENTARIO

Please enter your comment!
Please enter your name here