Nos ta pensa tin bia, dikon gasta sèn riba papel di regalo siendo ku ta e kos den dje e hende mester. Pero ora haña un regalo bunita lorá, e hende no ke ni habrié. E atenshon ku ta pone na e lorá di e regalo ta nifiká hopi. I nos a papia ku Riglene Cristina di I wrap your gift. E no por imaginá su mes ku algu ku e tabata odia esta lora regalo, awe ta su negoshi ku e ta hasi ku hopi amor.

Kon el a kuminsá...

Tur kos a kuminsá masha chistoso. Ora bo tin yu, semper tin un hasimentu di aña. E tin un baul di emergensia i ora un mucha hasi aña ta for di e baul e ta saka regalo. El a saka un regalo i a bai un sentro komersial i a lubidá di lor’é. El a baha e yu einan i no tabatin ni un pakus pa lora e regalo aki. Nan tabata bis’é e tin di kumpra serka nan pa e lor’é. Di dos bia otro fiesta i el a bai kumpra un kadobon i no tabatin ènvelòp. Riglene ta kòrda ku dia e tabatin 16 aña el a bai traha na Monilet, kaminda tabata bende ko'i hunga den Saliña. E tabata lora regalo einan i e tabata odia e kos ei. Pero tòg mundu a drei, dal un buèlta i el ta hañ’é den un kos ku e no tabata gusta. I no ta nada obligá. E ta hasié ku plaser i asina e idea a nase. No tin kaminda ku ta lora regalo. Riglene a biba un temporada na Mexico i einan tin papeleria. Nan tin tienda pa kumpra papel di regalo, sinta stenchi i aki no tin e kosnan ei. Semper ta su deseo pa bin ku algu asina i p’esei e idea di dje aki a kai nèt bon. E ta bende ènvelòp, e ta bende kaha, sinta i ta lora regalo. I asina I Wrap your girft a yega 4 ta bayendo su di 5 aña di eksistensia.

Talento...

Riglene no a bai kurso kon pa siña lora regalo. Su mama ta artesano i el a wak e hopi. E kos ta ku kada hende ku e lora un regalo pe ta hañ’é asina bunita. Tin bia bo ta studia algu, i pensa ku ta e kos ei bo ta bai hasi pero talento ta e kos ku si bo sinti bo mes den bo mes, bo ta kai ariba ku ta bo talento por bira loke bo ta bai kome fo’i dje. El a hasi loke hendenan tabata gusta pa e hasi pa nan esta lora regalo i asina el a kai ariba pa e duna e servisio ei.

Komprondé e konsepto...

Na Kòrsou, na e negoshinan mes ta lora regalo. Pero despues di 4 aña di eksistensia, e ta kere hendenan a kuminsá komprondé e konsepto. Ora el a lanta I wrap you gift no tabata pa lora regalo so pero e tabata mas bien pa duna e esensia di kon un hende ta sinti su mes ora dun'é un regalo. Hopi di nos ta lubidá ora bo haña pakete di Pasku, nèchi lorá, bo no ke habrié pasobra e presentashon ta asina bunita. Su eksperensia ku a kaba di forma e konsepto ta ku dia el a hasi 30 aña, el a haña 50 florin den ènvelòp di un banko. E hendenan no a tuma ni e esfuerso pa lora esaki. I e sa ku tur hende ta purá pero e hende ku ta bai haña e regalo lo apresiá si e haña algu èkstra. I kisas bo no ta un gran loradó, pero e simpel echo ku ta duna e esfuerso pa hinka e kos den otro, e hende ta apresi’é. I ku e meta ei el a kaba di krea su konsepto. Poko poko e ta drentando i hendenan ta kuminsá komprondé. No ta e kontenido ta importante pero e kos rònt di dje. I ta esei Riglene ke motivá hende dikon ta asina importante pa lora regalo.

Kapta bista...

Tur kos ku bo bista kapta semper ta nèchi. I a hasi un investigashon na Merka kaminda atraves di algun studiante kier a wak kon dunamentu un regalo ta òf lorando esaki. E investigashon a mustra ku hende ta muchu mas kontentu ora e haña algu lora pasobra e entusiasmo pa sa kiko tin den dje. I Riglene ta kere ku esaki ta hunga riba tur sentimentu di un hende, esta kontentu, ansiedat pa sa kiko tin ei den, e atenshon ku e hende a duna pa lora e regalo. Tur eseinan ta importante i no simplemente haña un regalo. Hopi bia e hende ni sikiera ta habri e regalo pero ta warda ora e hende bai.

Lora un outo den regalo...

Riglene a konta ku e por logra hopi kos. Pa Sanikolas su subrinonan a haña skateboard i el a reta su mes ku esei ta e kos ku e ta bai logra. E kos di mas straño ku Riglene a lora tabata un sombré i sin ku e hende ni sa ku ta un sombré. I esei e ke ‘trigger’ un hende pa e pensa kiko tin den e regalo. Tur bia e ta reta su mes i ta spera ku aki 10 aña e por lora un outo kompleto i no solamente pone un sinta.

Plèstik, saku di papel i hopi mas...

Kiko usa pa lora regalo. Riglene a splika ku por usa diferente kos. Ta usa papel di regalo pero hopi hende no ta konsiente ku pa kada un akontesimentu hende ke kumpra un papel di regalo. Pa Pasku por ehèmpel ke kumpra papel di e temporada. E no ta kere ku mester ta asina. E ta pensa ku por usa papel maron ku ta usa komo saku di supermerkado, por hasi hopi kuné.  Un papel por us’é asta dos banda. I no ta e lorá so pero tambe e kos ku ta pone riba dje. Den temporada di Pasku e ta pone bèl di Pasku i adornonan, sinta. Kada un temporada e ta usa kisas e mesun papel di regalo pero diferente adorno pa identifiká e periodo ku ta aden. No nesesariamente mester ta papel di regalo pero e por ta saku, papel di korant, plèstik.

Makutu di kondolensia...

Talento Riglene a enfatisá. Tin bia nos ta bringa nos mes pa hasi atministrashon pasobra esei mi a siña. Pero kisas e hende por traha un salsa rosada masha dushi i dikon no merkadeá. Nos ta pensa ku nos mester siña algu pa hasié. Pero den e temporada di COVID aki Riglene a bisa ku el a traha hopi bon. Den e momentu di tristesa aki, un regalo por pèp òp un hende. Ta hopi kos por traha, tur kos dependé e hende su talento. I e no ta kere ku ta lora mester lora man pero hasi negoshi pa por kome for di dje. Kisas no por kome lomitu di dje pero bo stoma ta yena. Riglene a bisa ku praktikamente e por biba di loramentu di regalo so pasobra tur dia tin algu. Asta segun Riglene ken a pensa pa duna un regalo ora di entiero i e ta hasié. En bes di un krans, por duna e famia algu simbóliko ku ounke den su momentu di tristesa e regalo por hasié kontentu. E ta traha makutunan di kondolensia. Riglene a yega di lora asta bolo sin e hende sa ku ta bolo tin den dje.

Hopi mas...

I no solamente lora regalo pero e ta duna servisio di buska un regalo tambe. Esaki mirando kon drùk hende su bida a bira. E ta kòrda ku un bia el a bai yuda un hende i a hañ’é ta duna e servisio aki tambe. I asta e mes por entregá e regalo na e hende.