WILLEMSTAD.- Djaluna awor 23 di novèmber ta kuminsá e di 4 edishon di Lora Man Legal. Jo-Anne de Wind ta presentá otro Lora Man, despues di tabatin éksito ku e otro 3 nan. Tur  sa di hala hopi atenshon i a sigui; otro siman durante di 5 dia ta Lora Man 4.

Jo-Anne de Wind ta splika ku teniendo na kuenta ku nos ta den e pandemia di Covid-19, nan tin di kambia un tiki e struktura. E promé Lora Man tabata na de Movies, e di 3 tabata virtual e aña aki kaminda mas di mil hende tabata sigui e programa pa dia. Komo e videonan ta keda den e página di Facebook ketu bai, nan a skohe pa no ripití ku e mesun hendenna dunando informashon. P’esei a skohe pa e bia aki pa tur dia den siman di djaluna pa djabièrnè lo tin un empresario ku su kaso real.

Jo-Anne a splika ku e empresario ei lo trese dilanti kiko el a eksperensia òf ta eksperensiando komo su kaso spesífiko i pa asina via di e plataforma aki por yud’e. Por ehèmpel djaluna lo tin e parti di inskripshon na Kámara di Komersio. Einan lo trata kiko mester pa registrá, kiko tene kuenta kuné. Ora kos bai bon tur hende ta kontentu, pero djis imaginá ku un dia kos no bai bon, ta kiko tin di tene kuenta kuné. Kosnan práktiko, kosnan legal manera kiko lo kosta pa inskirbi ets ets. Tambe lo tin MEO ku e parti di permit i lo kana ku e persona den sala pa splika tantu na kas komo e persona mes kiko ta e puntonan pa tene kuenta kuné. Jo-Anne de Wind a bisa ku e bia aki tambe Core ta habri su portanan pa nan.

Manera Jo-Anne a menshoná, Lor Man legal 4 lo dura 5 dia. Lo tin Meo, Jo-Anne de Wind mes, lo tin GGD ku lo splika ku e persona den kushina kiko e tin di tene kuenta kuné i asta  ku esun ku ta hiba kuminda tambe mester hasi e tèst di higiena. Lo tei sra Halabi kolega di dòkter Izzy Gerstenbluth pa splika kiko pa tene kuenta kuné komo empresario i Covid-19.

Jo-Anne a bisa ku no mester tin un kuenta di Facebook pa por sigui e programanan. Ta djis buska Lora Man Legal riba Google i einan por subi e plataforma. Esaki ta nifiká ku esun ku no tin kuenta di facebook por sigui. E programa ta kompletamente grátis i ta di 3 pa 4 or di atardi.

Pa loke ta e reakshonnan ku nan ta haña di partisipantenan den Lora Man 1, 2 i 3 Jo-Anne a bisa ku nan ta haña hopi pregunta i p’esei a bin ku Lora Man Legal 4. Ora a kuminsá, tabata e intenshon pa tin un Lora Man so, pero el a sigui te yega na e 4 edishon. E hendenan ta pidi i e echo ku ora manda aviso hopi ta Like i tin sosten di prensa tambe ta duna empuhe pa sigui duna man na hendenan ku ta Lora Man na Kòrsou.

Lora Man no ta un programa pa gana plaka pero tur ku ta partisipá den e programa ta hasi boluntariamente. Tin sr Cornelis di Meo, Jo-Anne de Wind mes i hopi mas entre otro Core tambe ku ta yuda. Nan a haña hende a pone Mic i kámara disponibel;. Nan ta kere ku mester duna un man na hendenan lokal.

E otro Lora Mannan a konsentrá na un tema spesífiko, pero e bia aki lo ta diferente. E bia aki e plataforma ta un podio pa e empresa pa splika su punto. I esei ta bira tur dia e diskushon di mas importante.

https://youtu.be/wxRaxPSaWkw