Willemstad.-
Polis ta investigando un kaso di tiroteo riba dos agente polisial ku a tuma lugá dilanti di un minimarket situá na Montaña Abou. Segun informashon ku a kompilá na e sitio di e insidente, dilanti di e Minimarket tabatin dos agente polisial na sivil sinta ta kòmbersá. Un dado momento un hòmber, kende su identidat ya ta konosí pa polis, manehando un outo kolo blou a yega para dilanti di e establesimentu i lòs dos tiru pa despues hui fo'i e sitio ku un velosidat haltu. Sentral di polis a keda inmediatamente pone na altura i a start un búskeda formal di e suheto. E búskeda a ekspandé te den área di Brievengat kaminda e sospechoso lo ta biba. Te na momento ku Extra tabata redaktando e artíkulo aki, polis no a logra pone man riba e sospechoso. Aparentemente despues di e suseso, e sospechoso a kambia di vehíkulo pa di e manera ei logra evadí polis.
E kaso ta kontinuá bou di investigashon. Pa mas detaye di e kaso sigui chek nos website www.extra.cw òf chèk bo korant mañan mainta pa e último desaroyo di e kaso aki.