Isla mes lo tin interes?

WILLEMSTAD.- Abogadonan di e ofisina OX & Wolf ta preparando benta di un lote di krudo ku ta almasená na COT, Bullenbaai. Ta trata di 199.882 bari di Santa Barbara Crude Oil i tambe 3.420 bari di Tia Juana Pesado Crude Oil. E krudo ta almasená den dos tanki separá. EXTRA mester apuntá ku un bia kaba a trata na bende e lote di krudo aki pero no a logra. Ta trata di e krudo ku a bini den e tankero Icaro na desèmber 2018. A konfiská e zeta i el a pone den tankinan di Isla na COT.

Deurwaarder a fiha fecha di 11 di desèmber próksimo pa pone e lote di krudo na findishi. Tur esnan interesá mester presentá ku un garantia di banko pa asina garantisá ku e por kumpli dado kaso e gana e findishi. Ta bini aserka ku despues ku e benta tuma lugá e gastunan di almasenahe i e krudo mes ta bira responsabilidat di e kumpradó. Ademas e kumpradó mester yega na areglo ku Refineria Isla Curaçao pa pòmp e krudo saka for di e tankinan pa kua e kumpradó mester a perkurá pa un òf mas tankero pa tuma e krudo.

Manera indiká ariba, no ta prome bia ku ta trata na bende e lote di krudo aki den findishi. EXTRA a investigá i a resultá ku e krudo Santa Barbara no tin e spesifikashonnan ku e refineria na Korsou ta kustumbrá na prosesá. Pa loke ta trata e krudo Tia Juana si ta unu konosí pa Isla, sinembargo e echo ku ta krudo venesolano ku a keda konfiská ta hasié difísil pa awor Isla (PDVSA) mes bai kumpra e Tia Juana aki. Ta bini aserka ku e kantidat ta hopi limitá pa e refineria. Pues e problemanan ku kompra di e kantidat tiki di Tia Juana e por okashon ta demasiado grandi.

Ku esaki a keda demostrá e kompleksidat di e negoshi di zeta/petroli. E krudo ta den tankinan di Isla for di dia ku el a keda konfiská pues ora e benta tuma lugá Isla lo por kuminsá kobra gastu di depósito i banda di esei e kumpradó mester buska tankero pa bin buska e krudo. E gastunan den esaki ta hopi haltu, asina esnan den e sektor ta splika EXTRA.