CARACAS.- Miéntras ku mundu tin bista pa e situashon di falta di kuminda ku venezolanonan ta sklama pe, na Venezuela mes tin informashon for di gobièrnu ku na Puerto Cabello a baha mas di 246.000 tòn di materia prima den kuadro di e plan di presidente Nicolas Maduro ku yama Gran Mision Abastecimiento Soberano (GMAS).

Ta asina ku un total di 7 barku grandi di karga a yega Venezuela. Ta trata di e barkunan Cielo di Cartagena, Fermita, Ocean OPAL, ILLOVO River, Almeria, UBC Stockholm, Mariana i Ocean Harmony. Trahadónan venezolano ta brindando e servisio den haf bou di protekshon ku medidanan di seguridat, loke ta demostrá e strategia di e gobièrnu di Maduro pa drecha e produkshon nashonal.

Ta bahando hopi lote di maishi oraño, hariña, suku i trigo awor ku nan a yega ku barku. Ademas ta promové industria venezolano tantu den sektor públiko komo priva. Di e forma aki e gobièrnu bolivariano ke vense e guera ekonómiko ku ta afektá poblashon venezolano.

Aros, papel wc i mas

E informashon ta ku na La Guaira a deskarga mas ku 2390  kònteiner ku alimento i otro merkansia. Ta menshoná ku ta barkunan prosedente si Colombia, Jamaica, Kòrsou i México i tur esaki ta forma parti di e Gran Mision Abastecimiento Soberano ku tin komo meta prinsipal fortalesé medidanan di e gobièrnu bolivariano pa abastesé e pais ku kuminda i lucha kontra di e guera ekonómiko ku e pais ta enfrentando. Entre e produktonan ku a yega Venezuela tin pasta, hariña di trigo, zeta, aros, papel di wc, bruki pa beibi, produktonan pa higiena personal, mayonès i vários otro mas.