LOUIE LOUIE

Felis djamars…

Awe ta fecha pa e reunion di AGKK i JAG ku lidernan di gruponan di Karnaval…

E punto prinsipal ku lo atendé ta e situashon di tráfiko, ku e diferente elevashon ku tin riba na Jan Noorduynweg…

Shofùrnan di treiler tambe a keda invitá pa asistí na e reunion i pa nan por risibí e informashon di ámbos organisashon…

Awe ta fecha tambe pa entrega di premio di Festival di Tumba 2019…

A skohe SAMBIL komo sitio di entrega di premio…

Ma komprondé ayera nochi ku e entrega di premio lo tuma lugá den e parti di Sambil kaminda e botika tabata ubiká…

By the way, e reunion di AGKK i JAG ta tuma lugá na Sambil tambe, pero nan lo ta na e otro banda dje edifisio, den e área banda di Cinemark…

Awe nochi nos lo sa ta ken a sali tumba popular 2018…

E premio aki ta entre Ray Lauffer ku Yuyu Zalm, nan tabata e 2 tumbanan ku mas a zona aña pasá…

Djasabra awor ta fecha pa pone stellage…

Harma bo kos tempran pa anochi bo tei tempran pa wak e parada di baiskel ku lus organisá pa Fundashon JAG…

Ayera nos a topa e tim di prekario ta marka tereno riba ruta di Karnaval…

E markamentu di tereno aki ta evitá ku despues di djasabra awó lo tin diskushon di ken tin derechi riba e tereno i kon grandi esaki lo mester ta…

Ma kere ku Lindo a baha ku penshun di prekario, pero ayera ma mir’é riba ruta…

Nos a komprondé ku tin 2 grupo di Parada di Tiner ku a kai afó, loke ta pone ku mester bolbe adaptá e lista ofisial di numerashon di gruponan di Karnaval, motibu pa kua ainda no a divulgá e listanan…

Gruponan Grandi tabatin tempu pa kambia numerashon i nos a komprondé ku algun di nan a hasi uso di esaki…

Mi ta na altura di un grupo ku a kue number 1, number ku normalmente e parti di protokòl ta hasi uso di esaki…

Ta kon por ta posibel ku e number ei ta den buzon pa grupo skohe…

Awó ma komprondé ku protokòl tambe mester a skohe number i nan a saka for di tómbola un number grandi, loke e grupo # 1 a hap riba dje mesora…

E tipo di situashonnan aki mester keda evitá…

Meskos ta e sakamentu di órden di aparishon pa e anochi final di Festival di Tumba, a kita for di kòmpiuter i bai 2 vas, pero e situashon a keda praktikamente meskos, e úniko diferensia ta ku den kada vas lo bo mester tin suerte pa e number ku lo bo skohe…

Ma komprondé di algun músiko ku den reunion a pidi pa balansa djaluna, djamars i djárason, pero ku ta laga tur banda tin mesun suerte riba djabièrnè, pues tur banda den 1 tómbola…

Pero esaki no a tuma lugá…

E siguiente reunion tur esnan ku tin reklamo riba kualke punto relashoná ku Festival di Tumba mester asistí na reunion i traha proposishon pa hasi e kambionan ku nan ta deseá…

Awe nos a kombiná nos ‘Louie Louie’ ku algun potrèt di públiko ku a asistí na Festival di Tumba…

Aktividatnan pa rekoudá fondo pa gruponan di Karnaval ta djis tras di porta, kuminsando e wikènt aki ku algun aktividat ku lo mester sirbi pa gruponan yega na sèn pa kubri gastunan pa bai Karnaval…

Mi ta gosa kon praktikamente tur kantante ku a partisipá den final di festival di tumba ta promové nan tumba ku nan a presentá, te hasta awor despues di e festival…

Nos tei move, trabou ta sigui, nos mester sigui pusha pa Kòrsou bai dilanti…

SHARE

LEAVE A REPLY