Un felis djamars pa tur nos lektornan...

Trabounan ta sigui na diferente sede, ounke mester bisa ku trabounan ta bastante avansá...

No ta manera ántes ku sedenan ta keda habrí te lat, e miembronan ta bin fo’i tempran pa yuda kita trabou fo’i man...

Pa 11 or kaba mayoria sede a sera porta...

Tin algun ku si ta keda traha mas lat, pero esaki mayoria di biaha ta sosodé den wikènt...

Ayera tardi e organisadónan di Hak’e a presentá e pèchi nobo pa 2019...

E koló blanku a keda bunita ku e logo di Hak’e riba dje...

E echo ku e ‘cap’ parti abou tin e kolónan tambe dje logo ta hasi e pèchi aki tòg un spesial...

Manchi, Quincy i Hyacinth ta trahando duru pa e wikènt aki ofresé e públiko di Hak’e un festival di kita sombré...

E promoshon relashoná ku e evento ta duna bu tur informashon pa kombens’é bu pa asistí na e evento...

Ma tuma nota ku no tin fiesta di Karnaval pa Grandinan mas organisá pa e organisadónan di Karnaval...

Loke a tuma lugá e aña aki na Habaai ta un fiesta di Karnaval organisá pa Fundashon Birgen di Rosario...

E diferente kasnan di kuido a partisipá, pero manera esaki tabata sosodé ántes kaminda ta sali bai ku e klientenan dje diferente kasnan di kuido na un sitio pafó di nan ambiente di tur dia, no ta sosodé mas...

Algu ku a hala mi atenshon ayera ta e komentario ku un persona konosí ku e situashon aktual di diferente grupo ku a indiká ku ounke ta mustra ku kosnan ta kanando ku fasilidat pa gruponan, tòg tin basta tenshon...

Tin kantidat di hende ku ainda no a kaba di paga nan prikichi i lidernan di grupo ta man na kabes...

E persona aki a te hasta yama e situashon un ‘drama’, mirando ku tin gruponan ku a pèrdè miembro i loke a sobra no a kumpli kabalmente ku reglanan, pero debí ku tin pagonan hasí, no por tuma medida i mas bien ta koriendo tras di e miembronan pa kaba di kumpli ku e famoso prikichi...

Gruponan a ser kreativo i a ofresé tur tipo di oferta pa logra atraé miembronan nobo, e grupo di hóbennan e aña aki a ser aserká ku promoshon i oferta di un forma agresivo ...

Nos ta spera ku gruponan por logra pa atraé e kantidat di miembronan ku nan tin mester den pitu aki, pa dje forma ei ‘break even’...

Nos fuente a indiká ku despues di Karnaval lo tin algun drama tei sosodé...

E siman aki ta drai trankil, wardando e hendenan pa kuminsá kobra e fin di wikènt aki...

Djasabra tin e jump in di ‘Nos ku Nos’ na Landhuis Brakkeput Mei Mei, un ambiente apart pa esnan ku gusta kosnan apart...

Pa otro siman ta fecha pa Jump in di SOAB, Zjangilae, Crazy Diamonds i Bab i e jump up di Radio Mas ku ViseVèrsa...

E ambiente kantu di kaya, riba ruta di Karnaval tambe ta kohiendo forma...

Nos a pasa ayera tardi i tuma nota ku tin algun stellage ku ta praktikamente kla i ta pintamentu so mester tuma lugá...

E djùg tei kaba i sonrisa riba kara dje hendenan ku ta dal un beter ta na òrdu di dia...

Un negoshi ku segun mi tòg a baha man ta esnan ku ta kuida muchanan na momentu ku mayornan sea forma parti di un grupo di karnaval òf bai para kantu di kaya...

Antes ta basta promoshon tabatin pa esaki, aworakí esei no ta e kaso mas...

Pa awe tardi tin un homenahe di Fundashon Alelimo na Rei di Tumba, Dibo Doran...

Dibo ta e promé Rei di Tumba Hubenil ku ta gana e festival grandi tambe...

Esei te motibu pa kual Fundashon Alelimo ta hasi un homenahe chikí na nos Rei di Tumba 2019...

Nos tei move, tabata un plaser pa kompañá bu den otro edishon di ‘Louie Louie’...