Un felis djabièrnè pa tur nos lektornan…

 

Nos tei awe ku otro edishon di ‘Louie Louie’ …

 

E notisia di fayesimentu di Yuyu Djaoen ayera a kore manera biná a tende tiru…

 

Masha lihé retnan sosial a keda yená ku palabranan di kondolensia di parti di músikonan i tambe promotor i fanátikonan di e gran músiko aki…

 

Kasualmente ayera Sidney Stefania a toka algun dje éksitonan grandi di e gran kompositor i músiko aki…

 

Yuyu ta e fundadó prinsipal di e agrupashon musikal Fuerza II i ta tambe kompositor di vários dje éksitonan grandi den e género di kòmbèk…

 

Forsa na famia, amigunan músiko i tur ku a konosé Yuyu…

 

Awe mainta e komishon di farándula tei topa ku Minister Steven Martina…

 

Ban spera Minister Martina por saka man i yuda e músikonan…

 

Minister Martina mes ta un músiko i e sigur lo por komprondé den kiko e músikonan ta pasando aden…

‘Louie Louie’ ta di opinion ku sikiera e kamindanan ku por garantisá ku no tin bailamentu por kuminsá laga músikonan toka…

 

Pa fiesta mester sea bini ku algun regla estrikto, pero duna e públiko chèns pa por sali, dibertí i baha stress…

 

Promotornan ta kreativo i segun ma komprondé tin diferente konsepto ku lo keda presentá awe kaminda ku koperashon di tur hende esakinan por tuma lugá…

 

Reakshon pa wak e dokumental ‘Atardi’ ta asina grandi ainda ku durante di henter luna di sèptèmber e dokumental lo sigui pasa riba pantaya grandi tantu na The Movies Punda komo na Cinemark na Sambil…

 

Bon chèns pa esnan ku no a wak e ainda haña un chèns pa bai wak e tremendo dokumental aki produsí pa Selwyn de Windt i su tim…

 

E konosido perkushonista Vernon Chatlein a kaba di terminá un produkshon titulá ‘Voices from letters: Zikinza’…

 

Próksimamente e produkshon aki lo keda presentá …

‘Louie Louie’ por a komprondé ku ta trata aki di homenahe na nos ansestronan, nan leyenda i nan magia…

 

Ta trata di un kolekshon kansionnan ku a keda graba den pasado i ku awor e produkshon aki ta tira un spòtlait riba nan…

 

Ayera nos a tuma nota di un video ku tabata sirkulá riba facebook kaminda ta hasi menshon dje echo ku tin animashon musikal tumando lugá na un popular sitio den área di bapor kibra…

 

‘Louie Louie’ a bai informá i a komprondé ku e sitio kaminda tur djárason tin presentashon di dj i ku ta logra atraé un kantidat grandi di públiko for di dia ku a anunsiá ku ta prohibí presentashon ku nan a kambia nan konsepto…

 

Nan restorant ta loke ku ta habri awor i ta presentá un show musikal pa e públiko por disfrutá di dje…

 

E pida video ku a keda grabá ta mustra nèt e momentu ku tabatin interakshon dje grupo di bailadó ku e públiko…

 

Nan a konfirmá pa ‘Louie Louie’ ku durante dje dos último simannan aki tin kontròl di Polis ta tumando lugá na e sitio…

 

Ta di lamentá ku ta krea un impreshon eróneo …

 

Felis wikènt, disfrutá i nos tei bèk djaluna ku Dios ke!…

LAGA UN KOMENTARIO

Please enter your comment!
Please enter your name here