LOUIE LOUIE

 

Un bon siman pa tur nos lektornan.

Siman nobo a habri i tur hende ta pendiente awor pa e rueda di prensa di Gobièrnu awe mainta 11.30 kaminda lo bai anunsiá medidanan ku lo drenta na vigor relashoná ku e pandemia di Corona/ COVID-19.

Ban spera ku e medidanan ku keda anunsiá lo no tin impakto fuerte riba nos ekonomia. Seramentu di negoshi, restorant etcetera lo tin un impakto negativo.

Mi ta kere ku Gobièrnu tambe mester trese dilanti òf supstansiá, no solamente ku e kantidat di kasonan, pero tambe ora ku tuma medida riba un sektor, duna informashon kiko a kondusí na e desishon aki.

E kontròl riba kaya tambe tin ku kontinuá, tin hende no ta komportá i nos por komprondé pa sierto negoshinan ku nan tambe lo ke ‘strika’, haña entrada tanten bou dje situashon aktual.

Djabièrnè anochi nos a eksperensiá un kontròl di VKC riba Caracasbaaiweg na altura di un popular trùk di pan i nan aserkamentu tabata profeshonal. Yega anunsiá i pidi tur hende pa mantené distansia, sin ku nan mester a baha pa atendé ku e doño di trùk, debí ku ta klientenan tabata para riba otro.

E reunion ku Minister Martina djabièrnè mainta a bai bon manera Rignald Maduro a konta nos i ku bo por lesa den e artíkulo ku nos a skibi awe ‘DEN E BEMBE’. Janice Welhous a yuda i ketu bai ta yudando músikonan ku ke risibí ayudo di Gobièrnu.

Loke a sali na kla ta ku no ta tur hende ta yena òf duna informashon korekto di nan empresa, loke ta pone ku nan petishon por risibí un kontesta negativo. E komishon di Farándula ku a bishitá Minister Martina tabatin krítika tambe riba e situashon na Cabana riba djárason anochi, anochi konosí ku Cabana ta yen!.

E kontròl mester tuma lugá, siman pasá djabièrnè ‘LOUIE LOUIE’ a skibi ku tin kontròl ta tumando lugá durante di e último 2 simannan i ku te hasta e kontroladónan ta keda sinta den e lugá pa wak kiko ta tuma lugá. Aworakí e promoshon di Cabana ta ku nan tin un ‘Dinner Show’, sinta kome i disfrutá di un show.

Loke a sosodé siman pasá ta ku e grupo di baile a lanta algun bishitante i esei a keda filmá. Kapitan Roni, e hendenan ke pa bo tim bai kontrolá. Tin mas sitio ku no ta tene kuenta ku e distansia sosial i nos ta kere ku ta kontra di nan mester tuma medida…

Mester bini ku un medida ku ta sera e lugá inmediatamente i ku e siguiente dia un komishon ta tuma desishon si e lugá ta risibí algun dia ku e mester keda será komo straf i un multa…

Tuma medida sera tur lugá si ta un tiki duru segun mi. Un biaha mas, nos ta spera ku e medidanan ku lo anunsiá lo no tin un efekto negativo riba empresanan lokal. Nos tei kore, te djárason ku Dios ke !…

 

 

 

 

 

 

 

 

 

LAGA UN KOMENTARIO

Please enter your comment!
Please enter your name here