Un felis dia pa nos lektornan…

 

Un pronto rekuperashon pa tur hende ku a keda kontagiá ku COVID-19 i nos ta spera sinseramente ku nan lo por rekuperá …

 

Hopi hende ta keda kontagiá, e kantidat di hendenan den hospital tambe a subi masha hopi mes i esaki ta sigur di preokupashon…

 

E sertámen di Miss Universe Curaçao lo mester a tuma lugá djadumingu awor, pero nos a komprondé ku esaki a keda posponé i no tin un fecha ainda pa e sertámen tuma lugá…

 

Nos a komprondé ku ta pendiente pa otro siman ora ku tende kiko ta e medidanan ku Gobièrnu lo tuma pa evaluá i pone un fecha nobo pa e sertámen di Miss Curaçao…

 

Manera ta konosí Chantal Wiertz lo ta nos representante na e di 69 edishon dje sertámen di Miss Universe ku ta plania pa tuma lugá dia 16 di mei 2021…

 

Explosion Dancers huntu ku Jada van Dijk a logra pa por presentá durante di Fashion Week ku ta tuma lugá den e promé siman di desèmber na Orlando, Florida…

 

Pabien na e organisashon ku e logro aki…

 

Un biaha mas ta keda demostrá ku nos tin talento aki na Kòrsou…

 

P’esei mi ta sigui kere ku nos tin tur potensial pa logra tur kos…

 

E promé kos ku mester sosodé ta UNI pa nos pone tur nanishi den mesun direkshon pa nos por traha huntu pa adelanto di Kòrsou…

 

Shonnan kòrda bai vakuná, nos mester bakuna pa nos por habri pa ekonomia kuminsá move ounke ta den e ‘normal nobo’…

 

Ma tuma nota na diferente pais kaba ku nan a kuminsá organisá eventonan, pero ku medidanan estrikto ku e públiko mester kumpli kuné…

 

Na Spaña organisadónan di un evento a te hasta sòru pa un sentro di kontrol kaminda por a hasi ‘rapid test’ di COVID, promé ku drenta e sitio dje evento…

 

Ta kosnan ku nos mester kuminsá pensa riba dje pa na momentu ku situashon kalma, flatten the curve, nos wak ku por keda realisá aki na Kòrsou…

 

No solamente ta importante pa bo vakuná, pero pa bo sigui mantené bo mes na e reglanan ku a keda imponé…

 

Tremendo splikashon ayera di Dòkter Semper durante dje rueda di prensa kaminda a duna mas splikashon riba vakunashon…

 

No lubidá ku Djabièrnè awor 10 or di anochi lo tin e presentashon dje Dokumental ‘Muzik sin Barera’ na TeleCuraçao…

 

E pida ‘trailer’ ku mi a wak riba facebook ta sufisiente pa e interes pa sera konosí ku e dos artistanan, Dibo D i Randal Corsen i tambe pa wak kon henter e proyekto di ‘Muzik sin Barera’ a keda hinká den otro…

 

Un biaha mas pa músikonan ta importante pa wak i siña for di e dokumental aki kon bo proyektonan por wòrdu hinká den otro …

 

Loke ta importante tambe ta pa bo sa ku ta eksistí posibilidat pa presentá bo proyekto organisashonnan sosial manera Prins Bernhard Cultuurfonds…

 

Nos tei move, djabièrnè ta ‘Bierne Santu’, ban kòrda pa reflehá i drecha loke ta robes pa nos ‘focus’ pa sigui padilanti…

LAGA UN KOMENTARIO

Please enter your comment!
Please enter your name here