Siman a parti na dos, dianan ta pasando basta lihé segun mi…

 

Awe nos ta start ku manda palabranan di kondolensia na famia i amigunan di e gran músiko Henky Djaoen, un dje mihó basistanan den género di kòmbèk…

 

Nos ta den lucha ketu bai ku e pandemia di COVID i ta tristu pa mira kuantu famia ta pasa den agonia ora ku un ser kerí di nan keda interná den CMC pa komplikashon…

 

Komo un persona ku a eksperensiá e preshon i stress ku bo ta pasa aden ora ku un di bo mayornan bira malu i ku bo mester apsorbá esaki no pa bo so, pero pa henter famia, e ta algu ku bo no por splika kon fuerte bo mester ta pa por pasa den e situashon aki…

 

Forsa na famianan ku tin un òf mas miembro di nan famia interná den CMC pa motibu di COVID…

 

Ayera mi a mira un skedjel ku Hulanda a traha pa loke ta trata e trayekto ku lo mester kana pa apertura di horeca i farándula…

 

Nan tin un plan di ‘tèst’ ku nan ta bai ehekutá pa eventonan grandi ku ta bai tuma lugá i tambe pa deporte…

 

E ta un plan interesante pa sigui i pa mira kon ta bai atendé ku eventonan grandi i e sentronan di tèst pa esnan ku a kumpra karchi pa evento…

 

E trayekto ku nan ta bai sigui lo ta un ku por bira un ehèmpel pa kon aki na Kòrsou nos lo por inisiá e trayekto pa kuminsá plania i ehekutá na momentu ku ta posibel pa organisá eventonan…

 

Turesten e trayekto di bakunashon ta sigui i mester spera ku lo por yega e kantidat di ‘herd immunity’ pa dje forma ei por kuminsá suavisá e medidanan…

 

Pa aworakí nos ta premirá ku lo sigui ekstendé e medidanan ku ta na vigor aworakí, ounke ku tin hopi empresa ku ta pasando momentunan masha difísil mes bou dje medidanan aktual…

 

Pueblo mester baha for di riba kaya si, tin demasiado vehíkulo ku ta koriendo riba kaya sin ta kumpli ku ‘plachi di dia’ òf no tin niun motibu bálido ku nan ta riba kaya…

 

Polisnan a kuminsá kita outo i awor lo bo tin ku paga but i tambe paga transpòrt di kran ku ta bai hiba bo outo warda…

 

Tin algun proyekto musikal pendiente pa mira lus di dia di kua nos ta na altura di sigur dos di nan ku e produktornan ta trata pa wanta e produkshon pa esaki por keda estrená na momentu ku tin un lus den tùnel pa loke ta apertura di horeca pa nan por saka nan invershon…

 

Ma mira un komentario di un promotor ku sigur ta pro pa tin presentashon musikal riba retnan sosial, pero no grátis, e ke pa músikonan kobra pa kubri nan gastunan i yega na entrada…

 

Bon shonnan, nos tei move, djabièrnè ku Dios ke nos lo tin otro edishon di ‘Louie Louie’…

 

Felis dia!…

LAGA UN KOMENTARIO

Please enter your comment!
Please enter your name here