Un bon siman pa nos lektornan…

 

Baidónan di fiesta i eventonan públiko e fin di siman aki sigur a disfrutá…

 

Kuminsando ku ‘King of Hits’ i siguí pa diferente otro eventonan públiko, bo por a tuma nota ku pueblo kier a sali i a sòru pa kumpli ku e eksigensianan pa nan por a sali…

 

Ayera tabata fecha pa e klousura di Siman di Ka’i Orgel…

 

E evento di klousura ku a tuma lugá na Club Boneriano i aki mester bisa ku ta diferente hende mayor di edat a keda defroudá ora ku nan a yega na entrada ku nan karchi di vakuna i no por a presentá un QR Code…

 

E hendenan tabata vakuná, pero no por a presentá un dokumento ku nan QR code riba dje loke a pone ku a ninga nan entrada…

Nos sa di sigur un grupo ku a yega i no por a drenta…

 

E situashon di e personanan vakuná ku no tin un QR code ainda ta basta grandi, sigur si bo tuma nota ku por ehèmpel partido MAN a organisá un aktividat kaminda nan ta yuda esnan ku no tin QR code pa yena e formulario digital pa nan por risibí na QR code…

 

Waaigat ayera tardi/ anochi a konta ku presensia di basta hende ku a bai disfrutá dje atardi di kuminda i músika…

 

E temporada di Tambú i Aguinaldo tei resultá un hopi ketu si tuma nota kiko e eksigensianan ta pa por organisá un presentashon…

 

Ma komprondé ku Sektor di Kultura a organisá un reunion ku gruponan di Tambú i Aguinaldo i ta solamente dos grupo di Tambú a presentá: Zoyoyo i Limania, miéntras ku ta 1 grupo di aguinaldo, Dushi Sorpresa, a presentá na e reunion …

 

Normalmente Kas di Kultura sa manda invitashon i tambe un komunikado ku ta sali den korant, pero e biaha aki no tabatin komunikado pa otro lidernan por a tuma nota di dje…

 

‘Louie Louie’ a komprondé ku e eksigensia pa hinka pèrmit pa presentashon di Tambú i Aguinaldo a keda poné na 5 dia di trabou, pero loke ta mas fèrfelu ta e eksigensianan bou di kua por organisá e presentashon…

 

E asuntu di QR code ta e strepi kòrá prinsipal den esaki i mirando ku e género di Tambú i Aguinaldo tin vários miembro i fanátiko ku no a vakuná ta pone ku bo no ta mira ku lo bai organisá aktividatnan kaminda e gruponan lo presentá…

 

Francis Sling su konsierto di poesia a resultá un evento ku sigur a impreshoná esnan ku a presensiá esaki durante di wikènt…

 

Realidatnan di bida a keda presentá di un forma serio i chistoso pa laga bu reflekshoná riba bida i su buèltanan…

 

Pabien na Francis i su tim, nos ta spera ku lo organisá mas dje konsiertonan aki pa laga mas hende presensia ‘F* Perfect’…

 

Nos a yega na final di otro edishon, un bon siman pa bo!

 

Te djabièrnè ku Dios ke!…

 

 

5 COMMENTS

LAGA UN KOMENTARIO

Please enter your comment!
Please enter your name here