WILLEMSTAD.-Awe djaluna 22 di febrüari tabatin un reunion di Parlamento yamá pa trata entre otro e kredensialnan di e miembro nobo sra. Capriles, ku mester drenta e kolegio komo e di 21 miembro. Un bia mas no a logra debí ku no a logra forma kuórem. Esaki ta di tres bia ku a yama reunion pa aprobá su kredensialnan, pero no a logra pa falta di kuórem.

Ta falta algu ménos ku un luna pa elekshon pa Parlamento di Korsou i por nota ku di partidonan di oposishon ta usando otro motibu pa splika dikon nan no ta bai reunion. Un argumento ku EXTRA a skucha di partidonan den oposishon ta ku no tin sentido awor aki, un luna promé ku elekshon, pa aseptá un miembro nobo den Parlamento.

Kombersando ku un eks presidente di Parlamento, veterano Dudley Lucia kende a duna nos su punto di bista. Lucia ta splika ku awor aki ta polítika ta dominá. ‘Awor aki faltando un luna pa elekshon mester komprondé ku e parti polítika ta pisa. Asta por a tende kaba ku di parti di partidonan di oposishon nan ta spera ku e gobièrnu aki lo entrega retiro i bai kas. Si elekshon a pasa kaba anto tin un situashon di impase lo por buska un otro manera, pero faltando apénas un luna pa elekshon ta e parti di polítika ta hunga un ròl.”

Pa loke ta trata e argumento ku oposishon ta usando últimamente, esta ku no ta hustu pa permití un hende drenta Parlamento pa djis algun dia anto keda kobra salario pa un aña, Lucia ta bisa ku hende por ta di akuerdo òf no, pero tin argumentonan ku ta hasi nan grado di komprenshon. Ademas no ta tur bia ta argumentonan rashonal ta konta den porta di un elekshon. Lucia ta insistí ku ta argumentonan polítiko ta konta awor aki. Despues di elekshon lo wak atrobe, pasobra ta durante di un reunion ku e konstelashon aktual mester aprobá kredensialnan di e Parlamento nobo ku ta drenta na mei próksimo.