WILLEMSTAD.- Luigi Faneyte lider polítiko di partido KUMUN a entregá su retiro djaluna último na e partido. El a bisa EXTRA “Mi ta kla pa e organisashon ku ta kere den mi”.

Den deklarashon na EXTRA Luigi Faneyte a bisa ku el a tuma retiro i a laga espasio na e partido, pa definí nan ruta i kaminda nan ke sigui kana despues di elekshon. “Te ora ami tabata lider te ku djaluna ei, ora mi a entregá mi retiro na partido, mi a bisa ku partido KUMUN a bin pa keda. Manera mi a bisa, lo keda vigilá tur desaroyo ku ta tuma lugá i lo keda informá i konsientisá e pueblo di e mihó opshon ku tin esta Hulanda, manera nan a bisa te na momentu ku ami tabata lider polítiko”, Luigi Faneyte a bisa EXTRA.

El a bisa EXTRA ku awor aki e no por bisa kiko e partido ta bai hasi pero pa esei mester tuma kontakto ku presidente di partido. Luigi Faneyte mes ta keda para shen porshento  tras di e idiologia ku el a lucha pe i a hinka den e partido esta Hulanda/Kòrsou awor  na e momentu aki, ku no por sali di e situashon deplorabel, situashon sosial i finansiero aktual, no por sin e ayudo di Hulanda.

Luigi Faneyte a bisa ku e ta keda semper un hende ku den un futuro lo boga pa un integrashon den Hulanda, den forma di munisipio hulandes.  Luigi Faneyte ta keda riba mesun liña i e ta keda papia mesun palabra i su idiologia ta un e ta.

El a sigui bisa EXTRA ku

“Mi ta un profeshonal. Mi ta keda duna mi análisis si mi keda aserka pa esei, i mi opinion riba desaroyonan polítiko aktual i manera mi a bisa promé di entrega mi retiro, mi ta keda informá i konsientisá e pueblo pa loke ta e realidat di e debakel sosial i e buraku finansiero ekonómiko den kual Kòrsou ta”.

“Esei no ta nifiká fin di mi partisipashon aktivo den arena polítiko. Kualke grupo organisashon ku si ta kere den loke ami ta kere den dje, den e idiologia aki, semper bai mi ta para habrí pa nan, si nan ke aserká mi òf sostené mi pa sigui ku e idiologia aki. Mi ta keda habrí komo profeshonal pa duna análisis polítiko, kontribushon, opinion, konseho polítiko i kaminda hende ta mira ku nan por usa mi kalidat, kaminda mi ta sinti mi na kas i kómodo pa mi saka e pais i spar Kòrsou, mi no ta bisa no pero mi ta habrí”.

Riba EXTRA su pregunta ku si el a sinti ku partido KUMUN ya no tabata kere mas den e idiologia ku nan a boga pe durante di elekshon pasá, Luigi Faneyte a bisa lo siguiente.

“Mi a purba tene e kos aki profeshonalmente, sin bai emoshonal, sin bira emoshonal. Pero realidat ta ku no ta tur hende den e partido ta mira futuro pa ku e idiologia ei. Kisas nan ta pensa ku e partido mester kue otro rumbo pa loke ta esei i nan ta kere ku SI nan por saka voto i asiento. Si ta asina mi ta bisa ku bo tin di kambia nòmber di e partido e ora ei i sigur si bo tin intenshon di kue kaminda di independensia. E klave den e partido ta ku nan no por a atendé ku derota òf derota personal tambe i e tipo di posishonnan ei a pone mi tuma mi konklushon i mi a entregá mi retiro’.