WILLEMSTAD.- Aqualectra i ministerio VVRP  ta instalando lusnan led riba tres karetera di Kòrsou.

A kuminsá riba Emancipatie Blvd Dominico Don Martina konosí komo Nieuwe Haven. Riba Emancipatie Boulevard Dominico Don Martina lo kambia 315 lus. E instalashon di LED riba e tres kareteranan aki ta forma parti di un prueba di konsepto (Proof of Concept) pa remplasá lusnan di kaya rònt Kòrsou, bou di direkshon di e Departamento di Obra Públiko di Ministerio di Tráfiko, Transporte i Planifikashon. Weg naar Westpunt, Nieuwe Havenweg i Schottegatweg ta forma parti di e prueba di konsepto aki. En total lo kambia 599 lus di kaya den e fase di prueba di konsepto. E lusnan LED no solamente lo garantisá un intensidat di lus mihó i konsistente riba kayanan na Kòrsou, pero tambe uso di koriente i mantenshon di e ret di lus lo ta muchu mas efisiente, dor ku Aqualectra ta risibí notifikashon instantáneo ora un lus no ta funshoná adekuadamente.

Por mira e diferensia den e lusnan di Led i e lusnan ku tabatin. E lusnan led ta mas kla, ta iluminá mihó manera e fotonan aki ta mustra.