WILLEMSTAD.- Maestronan di skol a reuní awe mainta na sede di nan sindikato Sitek. Ya kaba ta alrededor di un siman ku maestronan di skol ta den akshon. Awe mainta e maestronan di skol a ventilá nan desepshon pa e forma ku minister Alcala-Walle ta trata ku nan. A keda di pone un konferensia di prensa awe mainta 11’or na Sitek pa duna informashon na komunidat.

Maestronan di skol ku ta den akshon ta hopi fadá ku e situashon ku nan ta den. Nan ta di opinion ku minister Alcala-Walle ta burla di nan. Nan a rabia hopi ora ku a tuma nota ku minister a manda puntra si di bèrdat ta tur dia mester limpia shutters di klas. E maestronan ta haña ku asta otro koleganan ta burla di nan, puntrando kon a bai ku e wèlga. For di sala a bai e proposishon na e lider sindikal Lio Plantijn pa ora logra éksito, pa sòru pa esnan ku no a wèlga no haña e benefisionan.

Un bia mas maestronan den akshon ta mustra ku nan sakrifisio ta pa e muchanan i tambe nan ta luchando pa nan derecho. Nan ta lamentá ku minister Alcala-Walle ni sikiera tabatin e desensia di bishita sede di e sindikato i skucha e Trahadónan.

Ta un siman kaba nan ta den akshon, no ta happy hour ni bon kuné ta un lucha serio esaki ta, asina maestronan den lucha tabata sklama den sede di Sitek awe mainta.