WILLEMSTAD.- Lamentablemente malechornan ta keda kometé aktonan di atrako riba turista ku ta bin bishita nos isla, lagando un desepshon amargo atras.

E bia aki no solamente nan a atraká e dama turista, pero a bai hopi mas leu, dor di trata na sekuestr’é tambe.

Esaki tabata e kaso  ora ku algun hòmber a bai den área di Bapor Kibra i a atraká un dama turista. E echo aki no tabata basta, paso nan a trata na hink’e den outo pa bai kuné, pero e dama balente aki a forsagea ku nan pa evitá ku nan ta bai kuné. El a keda lastrá na outo pa kasi 200 meter, pero despues afortunadamente e malechornan a disidí lag’e keda benta mei mei di kaya. Esaki a pone ku e dama a sufri basta raspu na su kurpa. E malechornan sin eskrupulo aki a logra bai ku su tas ku kontenido. Polis i esnan di politur a presentá na e sitio pa asina duna  e dama asistensia.

E echo aki sigur ta un sla duru pa Kòrsou, kaminda nos ta bai den página skur.

Polis a tuma tur informashon serka e dama turista i tas pera ku por pone man riba e malechornan aki mas pronto ku ta posibel.