WILLEMSTAD.- Ayera atardi trempan, polisnan a keda dirigí pa Telamonstraat na Vredenberg pa asina atendé ku un kaso di kiebro.

Na yegada di outoridatnan a komprondé ku algun ratu promé un òf mas persona a kibra drenta den un bibienda. Nan a kibra un bentana i bai den e parti ariba di e kas. Loke e malechornan no tabata sa, ta ku tabatin un persona na kas na e momentu ei. Ora nan a tuma nota di presensia di e habitante, nan a move bai for di e sitio den nan vehíkulo.

Polisnan a señalá e vehíkulo riba Dr. Maalweg pero a pèrdè esaki for di bista.

Polis a logra pone man riba diferente grabashon di kámara i esei lo hasi nan trabou mas fásil pa pone detené e malechornan. No ta konosí si e malechornan a logra bai ku algu for di e kas.

Promé ku a logra kibra drenta e kas, e malechornan a bai mishi ku porta di un otro kas den e mesun kaya ei pero no a logra drenta den e kas.