Krímennan di impakto durante último periodo:

WILLEMSTAD.- Polis ta kontinuá analisando e krímennan di impakto haltu durante di e periodo di 7 pa 20 di febrüari 2022.

Den e periodo ei tabatin (4) registrashon pa loke ta atrako . Mayoria di e atrako nan aki a tuma lugá entre 21.00 ’ or i 22.15 ’ or durante di siman . E malechornan a konsentrá den e área di Skèrpènè, Roi Santu , Otrobanda i Grimauw. Dos di e atrakonan aki tabata riba kaya, unu den kas i unu den negoshi. Un di e atrakonan aki a keda kometé pa un kuarteto ku tabata kore den un outo di marka Kia den e área di Montaña . E shofùr di e Kia lo a dal parti patras di e outo di e víktima. Na momentu ku esaki a baha, nan lo a atrak’é . Petishon na tur siudadano pa ta alerta ku e forma di tira atrako aki.

Den e periodo di dos siman menshoná aki, tabatin (4) kaso di ladronisia di vehíkulo. Mayoria vehíkulo a keda hòrtá riba djamars i djaweps entre 21.00 ’ or i 23.30 ’ or i 00.00 ’ or i 05.00 ’ or. E área kaminda mas vehíkulo a keda hòrtá , ta Buena Vista i nan tabata vehíkulo nan di aña di fabrikashon entre 2007 pa 2011. Tres di e vehíkulonan aki ku a keda hòrtá , ta di e marka Mitsubishi.

Pa loke ta trata kiebro den kas a registrá (12) kiebro den kas i mayoria a tuma lugá riba djaweps entre 10.00 ’ or i 17.00 ’ or. Malechornan a bishitá e barionan manera Tra’i Seru, Oude Water, Groot Kwartier i Buena Vista. E individuonan a penetrá den mayoria kas dor di sea kibra òf fòrsa porta di kas di patras.

Polis a tuma den e periodo aki (16) denunsia di kiebro den negoshi. E kiebronan aki tur a tuma lugá entre 03.00 ’ or i 05.00 ’ or dor di fòrsa bentana di e edifisio. Mayoria di e kiebronan aki a tuma lugá riba e djabièrnènan. E área nan na unda e kiebronan aki a tuma lugá tabata hopi variá , esta for di Montaña Rei te Kenepa. Den e 16 negoshinan aki, tin 3 skol tambe ku e bira víktima di ladronisia.

Tabatin (3) kiebro den outo, ku a tuma lugá riba e djabièrnènan entre 03.00’or i 05.00’or. E método ku malechornan a usa tabata sea pa fòrsa òf kibra e bentana di porta na man drechi patras di e vehíkulo. Tur e kiebronan aki a tuma lugá na playanan òf na áreanan turístiko.

Polis mester a duna asistensia den (16) kaso di violensia relashonal, di kua mayoria a tuma lugá den fin di siman. E gran kantidat di yamadanan ku polis a haña pa atendé e kasonan aki, tabata entre 20.00’or i 21.00’or. E áreanan kaminda ku polis mester a duna asistensia pa e tipo di violensianan aki, tabata práktikamente rònt Kòrsou.