WILLEMSTAD.- Un informashon ku EXTRA a risibí ayera nochi for di Curaçao International Airport i CAP ta hasi menshon di un maleta sin doño ku a ser deskubrí, kual a pone ku mester a aktivá e protokòl di seguridat. E informashon ta bisa ku ayera den oranan djanochi den kareda di 19:20’or mester a aktivá e protokòl di seguridat pa motibu dje maleta solitario ku nan a topa den e área di yegada.

Sigun e prosedura, a sigurá e área pa sigurá ku e maleta sin solitario no tabata kontené nada peligroso. Kuerpo Polisial di Kòrsou a konfirmá ku no ta trata aki di un kontenido di preokupashon, i asina por a hasi e area liber atrobe despues di un ora. Ku esaki tambe por bira ku CAP i su empleadonan enkargá ku seguridat ta hopi atento riba tur kos, sigur si tene kuenta e mundu ku nos ta bibando aden aktualmente.