Arthur Nivillac ta wak bèk riba 12 aña i mei di Optima Arbodienst; Unda e lei laboral a keda

WILLEMSTAD.- Optima Arbodienst ta selebrá 12 aña i mei dia 1 di ougùstùs awor. Un kresementu bastante grandi ta loke Arthur Nivillac a eksperensiá den e añanan di eksistensia. Kuminsando den un kamber na su kas i awe un edifisio ku diferente servisio den Saliña.

Den e 12 aña i mei aki Arthur Nivillac ta konsiderá e logro di mas grandi, ku empresanan a kuminsá realisá ku mester stòp di medikalisá i wak kiko e hende ta pasando aden. Sabiendo ku apsentismo na trabou no ta malesa so. ‘Nos tur tin retonan privá den bida i tin retonan na trabou i si keda medikalisá, bo no ta duna e hende espasio pa e splika ku e no por traha pasobra  e no por ku e situashon laboral i e situashon den su bida ta strob’é’. Esei ta e pilar ku el a kuminsá kuné, esta wak kiko tin tras di e apsentismo i no keda focus riba e apsentismo riba su mes. I dunando atenshon i rèspèt i balor na e parti ei bo ta haña 300% di e trahadó. Esei ta e reto, ku Kòrsou a kuminsá laga lòs pasobra e no tabata konosé e parti ei. Tur kos tabata kaba ku bai dòkter i AO i den su kaso nan a siña e empresa ku asina nò, i pone atenshon riba e persona pa bo ta haña muchu mas.

Trahadó tin derechi di ta malu

Pero kiko Optima a hasi pa empresanan por a komprondé e punto di bista ei, nos a puntra Arthur Nivillac direktor i fundadó di Optima Arbodienst. Nivillac a bisa ku el a kuminsá siña e empresanan serka dje, ku dòkter no ta Dios. Na di dos lugá ora hende ta malu no tin di mand’é for di e promé dia pa Optima. E trahadó tin e derechi di ta malu. E tin derechi riba dos pa tres dia di bónus malu. E trahadó no ke pa nan/Arbodienst tuma over i e lo no keda mas ku 3 dia malu. I ora e persona bin serka Optima Arbodienst, e ta yega serka e ‘case manager’ ku ta hasi un análisis total di e situashon. Dikon e persona ta mèldu malu i dikon e patronchi ei. Despues ta wak si kisas ta un sikólogo òf trahadó sosial e tin di bai. I tiki tiki el a siña e hendenan ku tin di kana yega einan.

Arthur a splika ku e ta hasi análisis di tur e hendenan ku ta pasa Optima i lástimamente maltrato laboral ta hopi i ta kousa apsentismo. Na momentu ku e trahadó no ta funshoná i ta hopi malu, su produktividat no ta bon, i e trahadó ta ferwaktu ku e doño di trabou por yam’é i papia kuné di kiko ta pasando. Asina e hende ta habri enbes di grita e trahadó i zundr’é. Esei ta pone e hende sera i skonde tras di apsentismo.

Kombibí ku e trahadó

Otro kos ta e kombibensia ku e trahadó. Por ehèmpel si e bisa ku su mama ta hopi malu, e trahadó ta ferwaktu ku e siguiente dia ta puntr’é konta ku su mama i no puntra e trahadó si e tin intenshon di bin traha siguiente dia. Esei ta maltrato laboral. E doño di trabou sa ku e ta doño i ku e tin hende ta traha pe i tin di pag’é, pero si inbertí den salú di e trahadó i purba di komprondé e persona, bo ta haña mas tantu. I einan tin hopi di siña ainda. “Niun hende ta lanta for di nan kama pa bai hasi algu malu pero nos ta krea e persona pa e bai hasi algu malu. Na momentu ku bo ta hisa otro laga ami kai, intimidashon verbal ta e tipo di kosnan ei ta hasi un hende mònster i esei ta e problema. Nos tin e pensamentu ainda ku si bo no ta gusta ata porta, pasobra ta mi lugá. Pero nos ta traha huntu i nos tur dos mester di otro”. Arthur a splika den su kaso por ehèmpel ku awor ku e tin 12 aña i mei ku e empresa, e por bisa ku e no por drei Optima su so, pues e sa ki balor un trahadó tin. I esaki ta pone segun Arthur, ku e sa ki balor agregá e koleganan tin, ku na momentu ku e no tei, nan por tuma over. Pero bo tin di balorá nan sino enbes di nan tuma over nan ta bòikòt bo empresa. Esei ta e úniko kos ku e trahadó tin komo arma i ta hasié dor di mèldu malu. I ta netamente e tipo di kosnan aki segun Arthur, e ta invirtiendo masha hopi den su empresanan pa e relashon no ta unu asimétriko pero e relashon entre trahadó i dunadó di trabou mester ta unu simétriko. Lag’é sintié parti di e organisashon, lag’é sintié komo e ta doño di e empresa i asina bo por sera bo wowo bai lag’é i e sa i e lo kumpli ku loke e tin di kumpli kuné.

Tentamentu i intimidashon seksual no a baha na trabou

Banda di e maltrato laboral ku e trahadó ta pasando aden, tambe tin e tentamentu i e intimidashon seksual. Arthur Nivillac a bisa ku pa kasualidat otro luna ta terminá un investigashon kaminda a bolbe midi tentamentu i intimidashon seksual. I lástimamente e tin di bisa ku e no ta bahando. E ta asta bira mas tantu. Intimidashon seksual ta sosodé masha hopi i no solamente ku e dunadó di trabou pero kolega pa kolega i tentamentu ta birando mas grandi pasobra konkurensia laboral ta birando mas fuerte, di ken ta mas mihó i ken ta skor. Na momentu ku un kolega ta skor i tin abilidat ku otro no tin, mester mat’é. Arthur a referí na kosnan ku ta pasa ku hende no por imaginá nan mes. Por ehèmpel esun kolega sa ku e otro ta yega tempran i ta pone bestia den awa pa ora e bai bebe kòfi e traha esaki ku awa ku bestia manera un blòblò den dje. Ta hasi brua pa otro, ta pone vírus den kòmpiuter pa kita tur loke tin. I esaki ta kosnan na Kòrsou i ta sosodé masha hopi. Por ripara ku e hendenan ei ta kuminsá kai afó pa problemanan sikológiko, pasobra nan no por imaginá nan mes ku nan mes kolega ta hasi e kos ei ku nan. I asina por menshoná hopi mas. Hopi di e kosnan aki ta parse ku ta kosnan di otro pais, paisnan grandi pero ta aki tambe nan ta sosodé. P’esei Optima ta keda boga pa un kultura sano pa funshoná aden. Si e dunadó di trabou, HR no tin bista kiko ta pasando riba flur, e ta duna espasio pa e tipo di kosnan aki pasa. I tin ora e mes ta forma parti di dje tambe.

Lei laboral mester bin

Un di e puntonan ku Arthur no ta stòp di boga p’e ta lei laboral. El a bisa ku 4 aña pasá tur partido a kore kampaña pero no a hinka lei laboral aden. E ta spera e bia aki si e ta forma parti di e kampaña. No ta algu ku e ta benefisiá di dje pero ta Kòrsou ta benefisiá di dje. E ta spera ku e elekshon próksimo, e kampaña di partidonan lo konsentrá tambe riba lei laboral.