WILLEMSTAD.- Fiskal durante un kaso di infrakshon di tráfiko ayera a atvertí un damita di 16 aña, ku si un bia mas e keda gará tras di stür, e lo haña kastigu di detenshon hubenil.

Durante un kontròl di tráfiko polis a para e shofùr, ku a resultá di tabata un menor di edat.

Segun e prosèsverbal, e tabata kore outo sin reibeweis, sin seguro válido i sin impuesto.

Durante tratamentu di e kaso e damita a presentá ku su mama den sala.

El a splika ku e dia ei tabata e úniko dia ku el a stür e outo riba kaminda públiko.

E menor a splika ku el a sali kas pa bai kumpra ko’i kome na un toko djis den besindario. E mama no tabata por pa motibu ku e tabata malu i a tuma e rísiko numa pa laga e yu bai.

Fiskal a bisa ku esaki ta un rísiko enorme ku e mama aki a tuma.

Segun fiskal, e mama a aktua di un forma iresponsabel i ku esaki no mag di sosodé mas. Fiskal ta di opinion ku si tabata algu di urgensia, nan mester a buska otro hende responsabel pa bai hasi nan e fabor.

Pa loke ta trata e but, fiskal a bisa ku pa e bia aki e ta apsolvé e damita mirando su edat.

Fiskal a duna di konosé ku e no ke mira e damita mas tras di stür, te dia e kumpli e edat ku lei ta permití.

Hues tambe a papia di un forma hopi severo ku e mama i a bis’é ku el a tum’é hopi na malu.

Tambe hues a bisa e hóben ku el a hasi algu ku su mama mes a permití, pero ku mas bien e tambe mester a pensa mas aleu ku esaki no mag mirando su edat.

Hues na final a bisa di ta bai di akuerdo ku e demanda di fiskal.