CAPELLE AAN DEN IJSSEL.- Mama biológiko di Jerryson Noor di 15 aña, hóben yu’i Kòrsou ku polis a tira djadumingu último mata, ta bai hasi denunsia kontra dje agente polisial. Jerryson ta di Capelle aan den Ijssel, pero tabata biba na Gouda serka un famia di kriansa. Su mama di kriansa ta sra. Marian di 59 aña, kurasoleño, kende den e bario ta ser yamá “Dushi” òf “Mama Tera”, dor di su aktividatnan boluntario di yudansa den e área i tambe tabata organisá aktividatnan kultural.
Pa loke ta trata e mama biológiko, su abogado, mr. Gerald Roethof, a deklará ku esaki a aserk’é pa asistensia hurídiko pa ku e denunsia ku e ta hasi kontra di e agente polisial ku a tira su yu mata na Mc. Donalds na Hoofdweg djadumingu último. El a kaba di kita un ‘fatbike’ bou di menasa, i tabata den área di Mc Donalds. Polis a duna Jerryson órden pa para, pero el a kore bai i den esaki e polis a lòs bala mortal riba dje. E mama ta kere ku aki por papia di un kaso di asesinato. Tantu e mama komo e abogado ta kere ku e agente polisial a faya den instrukshon di su trabou, ora el a tira e hóben mata.
Bala for di arma di kandela dje agente polisial a alkansá e hóben den su lomba. P’esei e mama a hasi apelashon pa testigunan bai polis, òf mèldu na e abogado, ku lo manda nan pa polis ku ta investigando e kaso. E mama ke laga su patólogo tambe hasi investigashon di kurpa di su yu.
Ayera ministerio públiko a informá ku e arma ku a haña banda di Jerryson tabata unu ku ta funshoná i ku a keda transformá den forma di un ‘gasalarmpistool’.
Entre tantu a start ku rekoudashon di fondo pa un despedida ku honor pa e hóben, i tambe gastunan di abogado. Nan ke rekoudá alrededor di 7000 euro. Miéntras ku awe den kareda di 17:30 di atardi (ora di Hulanda) lo tin un kaminata pa rekordá e hóben. E kaminata ta tuma lugá den e “bario” kaminda el a nase i muri, ku ta Capelle. E ta kuminsá na e kas na Wijk Middelwatering riba Lijstersingel i ta terminá na warda di polis na Slotlaan. E mama di kriansa lo hiba palabra, i lo pidi tur hende pa no husga si no sa kiko a pasa i mira e e persona komo tal.