WILLEMSTAD.- Durante tratamentu di e kaso di e duo Kimberley Carti (19) i e rèper Arthuro ”Papucho” Daal Hooi (19), akusá di a tira atrako na toko Jai Li Minimarket dia 30 di desèmber 2020, fiskal a bisa ku e ta haña ámbos akusado kulpabel den e kaso aki. Carti  ku ta mama di dos menor, a atmití ku e ta e hende muhé ku por a mira riba imágennan di kámara, ora el a drenta e toko kara tapá, huntu ku un hòmber. El a bisa ku e tabata drogá i no ta kòrda mas kiko a pasa.

Segun fiskal, tur kos a kuminsá, ora Carti a pidi “Papucho” sèn pa e kumpra kos pa su yunan i ku e lo pag’e bèk. Papucho a busk’e i bai kuné na su kas, kaminda tabatin algun hende mas. Despues e mester a drenta den outo ku Papuchu huntu ku un persona ku a fungi komo shofùr i nan a kore bai e toko i kometé e atrako. Papuchu te ainda ta ninga di ta e hòmber kara tapá riba e imágennan. E kòmbersashon ku polis a haña den Carti su telefòn, kaminda e ta bisé pa busk’e na pòmp di gasolin i tambe puntr’e si e tin “gun” tabata  registrá riba number ku tin Papucho skibi. Fiskal a bisa ayera, ku e no ta kere nada di loke Carti a deklará, ku e tabata puntra Papucho pa kompañé bai serka un gai ku e tin problema kuné. Segun fiskal, e ta tene kuenta ku e rapòrt sikiátriko i sikológiko, ku ta indiká ku Carti ta ménos responsabel pa su aktonan. Tambe fiskal ta tene kuenta ku Carti su edat hóben i ku e ta mama di dos yu menor. Mirando tur esakinan, fiskal ta yega na un demanda di 4 aña, di kual 2 kondishonal ku un periodo di prueba di 2 aña i tambe guia di FMA i trainingnan di Reclassering. Carti na final a bisa ku e ke sali fo’i prizòn pa bai wak su yunan i despues bai Hulanda serka su rumannan. E ke stòp di uza molly, kaba su skol i studia pa bira dòkter.

Pa loke ta trata Daal Hooi, fiskal a bisa ku segun e rapòrt sikológiko i sikiátriko, e ta kompletamente responsabel pa su aktonan. Fiskal ta hañ’e kulpabel pa su echonan i ta demand’é na 4 aña di prizòn, guia di Reclassering i 2 aña di prueba. Daal Hooi den su último palabra a keda insistí ku e ta inosente.

Hues na final a bisa ku Carti tabatin basta problema ku su mama den su infansia. Na skol tampoko e tabata bai muchu bon. Segun hues, e ta tene kuenta ku e rapòrtnan sikológiko i sikiátriko  i ku Reclassering ta bisa ku e chèns pa e bolbe kometé echonan asin’aki ta hopi grandi, debí ku fásilmente e por wòrdu influensiá. Segun  e rapòrt di Reclassering, un kastigu di trabou ta muchu mas mihó pa Carti, ku un kastigu di prizòn. Hues a bisa ku tur esnan ku a skibi rapòrt pa Carti, ta hopi preokupá ku su situashon personal. Hues a indiká ku e ta tene kuenta ku Carti su edat i tambe ku el a koperá ku hustisia.

Mirando tur esakinan, hues ta desviá for di e demanda di fiskal i ta uza e lei pa detenshon hubenil. Esei ta pone ku e ta kondená Carti na 18 luna di kual 12 kondishonal, mas 3 aña di prueba ku guia di Reclassering i FMA. Praktikamente otro siman Carti por bai kas. Pa loke ta trata Daal Hooi, hues ta uza e lei di detenshon hubenil den su kaso tambe i ta konden’é na 24 luna di kual 12 kondishonal mas 2 aña di prueba.