WILLEMSTAD.- Mama di e kriatura di 12 aña ku a bira víktima di su pareha ku e tempu ei tabatin 38 aña, tempu ku e tabata tene relashon kuné, a bisa di ta hopi rabiá ku e veredikto ku e akusado a haña.

Segun e mama, su eks pareha a destruí nan bida i a pone ku awe e ta leu for di su yu muhé. E mama a bisa nos di Extra ku apesar ku el a pordoná e hòmber, esei no ta kita ku e no ke pe sinta su kastigu.

E mama ku awa na wowo a bisa di a keda hopi desapuntá mirando ku e kastigu ku su eks a haña, pa e no ta sufisiente pa tantu daño ku el a hasi. Segun e mama, hopi hende a tum’é na malu, pasó el a bisa di a pordoná e hòmber.

El a bisa ku e mester a hasi esaki pa  motibu ku e tin ku sigui biba.  Segun e mama e no tabata na altura kiko tabata pasando den su kas i nunka por a pensa algu asin’aki.

Tambe el a bisa di ta desapuntá pa motibu ku su vehíkulo a keda kima  di kual el a kana tur su kaminda nan pero no a hancha niun tipo di yudansa.

Segun e mama, e ta sintié menasá  fo’i despues ku nan a kima su vehíkulo i ta sospechá ku esaki a keda hasí pa su eks. Al final e mama a bisa di ta spera ku hustisia lo prevalesé.