WILLEMSTAD.- Awe mèrdia Kòrsou a keda sakudí un biaha mas pa un kaso hopi tristu di asesinato ku a tuma lugá kaminda un mama hóben a keda asesiná pa su eks pareha dilanti no ménos ku 8 mucha menor di edat inkluyendo su mes yunan. Loke ku ta remarkabel di e kaso aki ta ku den e último dianan, na vários okashon tabatin konfrontashon entre e eks pareha aki.

E dama a keda maltratá, menasa i no ménos ku djadumingu último e dama a entrega keho despues di a keda kòrta ku un arma blanku pa e sospechoso kual ta su eks pareha.

Tabata alrededor di kuartu pa tres ku sentral di Polis a risibí yamada di un kaso di tiramentu ku a tuma lugá den Ordenansweg i unda tin dos persona heridá.

Na yegada di e unidat nan a bin tuma nota di un dama drumi abou den balkon di un kas, ku herida di bala i ku ya no tabata duna señal di bida. Mesora a pidi presensia di ambulans na e sitio, ku ya no por a hasi nada mas pa e víktima.  Dòkter di polis algun ratu despues a konstatá morto di e dama Dayanira Marcela Angelista Eisden, nase na Kòrsou dia 14 di novèmber 1993.

Di personanan na e sitio, polis a komprondé ku e otro víktima ku a sufri herida na man, kual porsierto tambe ta miembro di famia, lo mester a bai for di e sitio.  Na un establesimentu riba Gosieweg polis a topa ku e víktima aki i ku ambulans el a keda transportá pa poliklínika pa tratamentu médiko.

For di investigashon preliminar ku polis a realisá na e sitio a sali na kla, ku un ratu promé e sospechoso a kore yega na e kas den Ordenansweg den un outo i despues di un diskushon kòrtiku ku e tabatin ku e dama ku a fayesé, el a los algun tiru dirigí ku a alkansá ámbos víktima, di kua unu di nan mortal. Despues di su akto el a hui for di e sitio. Alrededor di bintisinku pa kuater e hòmber sospechoso H.R. di 46 aña di edat nase na Kòrsou a keda detené den Rancho.

Kontinuando ku investigashon a lokalisá vehíkulo den kual e sospechoso tabata manehá stashoná na un kas den área di Cas Coraweg.

A presentá e sospechoso dilanti di un fiskal ouksiliar, ku a ordená su enkarselamentu pendiente di mas investigashon.